విజయవాడ, ఆగస్టు 6: మమతానురాగాలకు, ప్రేమానుబంధాలకు నిదర్శనం రాఖీ పండుగ అని ముఖ్యమంత్రి చంద్రబాబు నాయుడు అభివర్ణించారు. సోమవారం రక్షాబంధన్ సందర్భంగా ఆయన రాష్ట్ర ప్రజలకు, దేశ విదేశాల్లోని తెలుగువారికి శుభాకాంక్షలు తెలిపారు. ఆడబిడ్డలకు తమ ప్రభుత్వం రక్షాకవచంలా ఉంటుందని చంద్రబాబు అభయమిచ్చారు. ఆపదలో ఉన్న మహిళల కోసం అభయహస్తం యాప్‌ను రూపొందించిన విషయాన్ని ప్రస్తావించారు.

విజయవాడ (క్రైం), ఆగస్టు 6: విధి నిర్వహణలో ప్రాణాలు కోల్పోయిన పోలీసు అమరవీరుల కుటుంబాలకు విజయవాడ క్లబ్ ఆర్థిక సాయం చేసింది. గుంటూరు జిల్లా తాడేపల్లిలోని క్లబ్‌లో ఆదివారం ఏర్పాటు చేసిన కార్యక్రమంలో డిజిపి నండూరి సాంబశివరావు చేతులమీదుగా క్లబ్ కమిటీ సభ్యులు 23లక్షల రూపాయలు అందచేశారు. మొత్తం 25మంది అమరవీరుల కుటుంబాలకు ఒక్కొక్కరికి 90వేలు చొప్పున అందించారు.

విజయవాడ, ఆగస్టు 6: దేశంలో జిఎస్టీ అమల్లోకి వచ్చిన నేపథ్యంలో సంప్రదాయ డిగ్రీ కోర్సులకు ఈ ఏడాది డిమాండ్ ఎక్కువగా ఉంది. ట్యాక్సేషన్, ఫైనాన్స్, ఇంగ్లీషు లిటరేచర్, గణితం, ఫిజిక్స్, కంప్యూటర్ సబ్జెక్టులు కలిగిన అండర్ గ్రాడ్యుయేట్ కోర్సులకు డిమాండ్ పెరిగింది. కళాశాలల్లో నాణ్యతా ప్రమాణాలు, ప్లేస్‌మెంట్ల తీరుతో విసిగిపోయిన విద్యార్థులు ఇంజినీరింగ్ కోర్సుల్లో చేరేందుకు ఆసక్తి చూపడం లేదు.

మంత్రాలయం, ఆగస్టు 6: కర్నూలు జిల్లా మంత్రాలయం క్షేత్రంలో వెలసిన శ్రీరాఘవేంద్రస్వామి ఆరాధన మహోత్సవాలు ఆదివారం అట్టహాసంగాప్రారంభమయ్యాయి. 346వ సప్తరాత్రోత్సవాల్లో భాగంగా మొదటి రోజు ధ్వజారోహణ వేడుకలు పురస్కరించుకుని మఠం పీఠాధిపతి శ్రీసుభుదేంద్రతీర్థులు సాయంత్రం శ్రీమఠం ముఖద్వారంపై స్వర్ణ బృందావన గోపురం దగ్గర కాషాయ వర్ణం జెండాను ఆవిష్కరించి ఉత్సవాలకు అంకురార్పణ చేశారు.