కల్తీ వస్తువులు కాటేస్తున్నాయి. పాలు, నీళ్లు, కూరగాయలు విష పదార్థాలతో కలుషితమైపోతున్నాయి. చివరకు ఆరోగ్యాన్ని కాపాడే ఔషధాలు కూడా కల్తీ చేసేస్తున్నారు. కేవలం ధనార్జనే లక్ష్యంగా అక్రమాలకు పాల్పడుతూ ప్రజల జీవితాలతో కొందరు ఆటలాడుతున్నారు. పాపభీతిలేని వారు చేసే ఇలాంటి పనులను అడ్డుకోవడానికి చట్టాలను ఉపయోగించక తప్పదు. ప్రభుత్వం ఈ దిశగా అడుగులు వేయాలి.
-ఎన్.రామలక్ష్మి, సికింద్రాబాద్

బ్యాంకు ఖాతాలకు ఆధార్‌తో అనుసంధానం చేసేందుకు డిసెంబర్ 31 వరకు గడువు ఉందని ప్రచారం జరిగింది. అనుసంధానం చేసుకోవాలని పదేపదే సంక్షిప్త సందేశాలు వస్తూనే ఉన్నాయి. ఈలోగా ఈ గడువును పెంచినట్లు వార్తలు వచ్చాయి. ఈనెల 11న బ్యాంకు వెళ్లి నగదు విత్‌డ్రా చేసేందుకు ప్రయత్నించినపుడు బ్యాంకు సిబ్బంది తీరు బాగోలేదు. టోకెన్ ఇచ్చి, డబ్బులు చెల్లించేందుకు నిరాకరించాడు.

ఆంధ్రప్రదేశ్‌లో పెన్షనర్లకు అనుకోని కష్టం వచ్చిపడింది. ప్రతీ సంవత్సరం ఫిబ్రవరిలో వారికి వచ్చే పెన్షన్ నుండి ఆ ఏడాదికి సంబంధించి వారు చెల్లించాల్సిన ఇన్‌కంటాక్స్‌ను మినహాయించేవారు. కానీ ఈసారి డిసెంబర్‌లోనే ఎలాంటి సమాచారం ఇవ్వకుండా పెన్షన్ నుంచి ఏకమొత్తంలో ఆదాయపన్నును కోత విధించారు. అనుకోకుండా ఇలా కోత పెట్టడంతో బడ్జెట్ తారుమారై పెన్షనర్లు ఇబ్బందులపాలయ్యారు.

సుప్రసిద్ధ కవి, సీనియర్ పాత్రికేయులు దేవిప్రియ రచించిన ‘గాలిరంగు’ కవితాసంపుటికి ఈ ఏడాదికిగాను కేంద్ర సాహిత్య అకాడమీ అవార్డు రావడం తెలుగు సాహిత్యానికి దక్కిన గౌరవంగా భావించాలి. సాధారణ పాఠకులకు కూడా అర్థమయ్యే రీతిలో రన్నింగ్ కామెంటరీ రాసిన దేవిప్రియ భావ, అభ్యుదయ కవిత్వంలో అందెవేసిన చేయి.