తెలంగాణ రాష్ట్ర ప్రభుత్వం ప్రతిష్టాత్మకంగా నిర్వహించిన ప్రపంచ తెలుగు మహాసభలు మాతృభాషకు పట్టం కట్టాయనే చెప్పాలి. శాంతియుత, సామరస్య వాతావరణంలో సభలు విజయవంతం అవడం తెలుగువారికి గర్వకారణం. ఏదో మొక్కుబడిగా సభలు నిర్వహించి ఊరుకోవడం కాకుండా మునుముందు కూడా ఏటా తెలంగాణ తెలుగు మహాసభలు నిర్వహిస్తామని ముఖ్యమంత్రి కేసీఆర్ ప్రకటించడం ఆయన దీక్షను చాటుతోంది.

ప్రపంచ మహాసభలకు భాగ్యనగరం వేదిక కావడం కొత్త శోభనిచ్చింది. తెలుగుభాషకు పుట్టినిల్లు తెలంగాణయేనని, ఈ ప్రాంతానికి చెందినవారు తెలుగుకు వెలుగు తెచ్చారని తెలిసి ఆనందం కలిగింది. ఈ సభల ద్వారా తెలుగు వైభవమేమిటో, మన మాతృభాషను ఎందుకు కాపాడుకోవాలో అర్థమైంది. ఇప్పుడు యువత తెలుగు భాషపై మమకారాన్ని పెంచుకుని పట్టు సాధించేందుకు కృషి చేయాలి. తెలుగుభాషను నేర్పే విషయంలో తల్లిదండ్రుల వైఖరిలో మార్పు రావాలి.

చట్టసభల్లో కొలువుతీరిన సభ్యులకు సంబంధించిన నేర విచారణలని త్వరితగతిన పూర్తి చెయ్యడానికి కేంద్రప్రభుత్వం 12 ప్రత్యేక కోర్టుల్ని నెలకొల్పడానికి ముందుకు రావడం, ఆ నిర్ణయాన్ని సుప్రీంకోర్టు సమర్ధించడం ఒక మంచి పరిణామం. నేరమయ రాజకీయాలను నిరుత్సాహ పరిచే మార్పు. 2014 ఎన్నికల అఫిడవిట్ల ప్రకారం దేశవ్యాప్తంగా వివిధ శాసనసభల్లో, పార్లమెంటులో నేరారోపితులు 1581 మంది.

ఆంధ్రప్రదేశ్‌లోని పలు జిల్లాల్లో, ముఖ్యంగా ఉత్తరాంధ్రలోని మూడు జిల్లాల్లో విషజ్వరాలు ప్రబలుతున్నాయి. దోమలవల్ల మలేరియా, డెంగ్యూ జ్వరాలు విస్తరిస్తున్నాయి. పారిశుద్ధ్యం నిర్వహణ సరిగ్గా లేకపోవడం, డ్రైనేజీ వ్యవస్థ లేకపోవడం దీనికి కారణం. శ్రీకాకుళం జిల్లా నరసన్నపేటలో విషజ్వరాలతో ప్రజలు సతమతమవుతున్నారు.