పోలవరం ప్రాజెక్టు విషయంలో కేంద్రం వైఖరిపై ముఖ్యమంత్రి చంద్రబాబు అసహనం, ఆగ్రహం లక్షలాదిమందికి ఆందోళన కలిగించింది. పోలవరం ప్రాజెక్టు పనులు నిలిచిపోవడంపై నిరాశ వ్యక్తమవుతోంది. కేంద్రం ఇచ్చిన విభజన హామీల అమలుకోసం ఇంతకాలం వౌనం వహించిన రాష్ట్ర ప్రభుత్వం ఇప్పుడు నిరాశానిస్పృహలు వ్యక్తం చేస్తే ప్రయోజనం ఏమిటి? ప్రత్యేక హోదా, ప్యాకేజీలపై అడగాల్సిన సమయంలో ఊరుకుని, అడిగినవారిని మాట్లాడనివ్వకుండా చేశారు.

తెలుగుభాషను కాపాడుకోవలసిన తరుణం వచ్చింది. తెలంగాణ ప్రభుత్వం ప్రతిష్ఠాత్మకంగా నిర్వహించనున్న ప్రపంచ తెలుగు మహాసభల సందర్భంగా తెలుగువారంతా మాతృభాషపై మమకారాన్ని చాటుకోవాలి. పరభాషా వ్యామోహంలో ఇన్నాళ్లూ అమ్మభాషను పట్టించుకోవడం మానేశారు. ఇప్పటికైనా ప్రజల ఆలోచనా విధానంలో మార్పురావాలి. ఇతర భాషలను నేర్చుకున్నంత మాత్రాన మాతృభాషను మరచిపోవడం సరికాదు.

అవినీతికి పాల్పడుతున్న అధికారులను కఠినంగా శిక్షించాలి. లంచం ఇవ్వని దిగువస్థాయి సిబ్బందిని వేధిస్తున్నవారిని ప్రభుత్వం వదిలిపెట్టకూడదు. గుంటూరు జిల్లాలో ఎన్.రవికుమార్ అనే దళిత ఉద్యోగి లంచం ఇవ్వలేక తన బాధను వీడియో తీసి ఆత్మహత్యకు పాల్పడిన బాధాకర సంఘటనలు పునరావృతం కాకూడదంటే ప్రభుత్వాలు స్పందించాలి. అటెండర్ నుంచి గుమాస్తాగా పదోన్నతి పొందిన ఓ సాధారణ దళిత ఉద్యోగి ఆ తరువాతి పద్నోతికి అవకాశం వచ్చింది.

ప్రభుత్వ శాఖలలో ప్రజలకు సంబంధించిన అనేక కార్యక్రమాలతో భాగస్వామ్యం ఉన్నది పంచాయతీరాజ్ విభాగం. ప్రభుత్వంలోని ఇతర శాఖలకన్నా వీరికి కాస్త పని ఎక్కువే. అయితే మిగతా విభాగాలలో ఉద్యోగులకు నిర్ణీత కాలపరిమితిలో పదవోన్నతులు వస్తున్నాయి. కానీ పంచాయతీరాజ్ శాఖలో జాప్యం జరుగుతోంది. పంచాయతీరాజ్ శాఖ పరిధిలో పనిచేసే ఒక మండల అభివృద్ధి అధికారి దాదాపు పద్దెనిమిది సంత్సరాలు అదే పోస్టులో ఉండిపోవలసి వస్తోంది.