షిల్లాంగ్, మార్చి 5: మేఘాలయలో కొత్త ప్రభుత్వాన్ని ఏర్పాటుచేయాలంటూ గవర్నర్ గంగాప్రసాద్ నుంచి తనకు ఆహ్వానం అందిందని ఎన్‌పిపి అధ్యక్షుడు కన్రాడ్ సంగ్మా సోమవారం నాడిక్కడ వెల్లడించారు. కొత్త ప్రభుత్వ ప్రమాణస్వీకారం మంగళవారం ఉదయం 10.30కు జరుగుతుందని వెల్లడించిన ఆయన ప్రభుత్వాన్ని ఏర్పాటుచేసే సంఖ్యాబలం తమకు ఉండటం వల్లే గవర్నర్ తనకు ఆహ్వానం పలికారని తెలిపారు.

కోహిమా, మార్చి 5:ఎన్నికల ముందు తమతో పొత్తు కుదుర్చుకున్న ఎన్‌డిపిపితోనే కలిసి నాగాలాండ్‌లో కొత్త ప్రభుత్వాన్ని ఏర్పాటు చేస్తామని బీజేపీ సోమవారం నాడిక్కడ స్పష్టం చేసింది. గత పదిహేనేళ్లుగా మద్దతిస్తున్న నాగాపీపుల్స్ ఫ్రంట్ (ఎన్‌పిఎఫ్)కు మద్దతిచ్చేది లేదని తేల్చేసింది. రాష్ట్ర అసెంబ్లీ ఎన్నికల్లో అతిపెద్ద పార్టీగా అవతరించిన విషయం తెలిసిందే.

అగర్తల, మార్చి 5: పాతికేళ్ల వామపక్ష కోటను కుప్పకూల్చి త్రిపురలో అధికారం చేపట్టిన బీజేపీ మంగళవారం శాసన సభా పక్ష నేతను ఎన్నుకోబోతోంది. బీజేపీ శాసన సభాపక్ష నేతలు, తమ మిత్రపక్షమైన ఐపీఎఫ్‌టీతో సమావేశమై ఈ కీలక నిర్ణయం తీసుకోబోతున్నారు.అయితే తమకు మంత్రివర్గంలో గౌరవనీయ స్థాయి కల్పించాలని ఈ గిరిజన మిత్ర పక్షం ఇప్పుడే డిమాండ్లు మొదలు పెట్టింది.

న్యూఢిల్లీ, మార్చి 5: ప్రత్యేక హోదాతోసహా విభజన చట్టంలోని అంశాలను అమలు చేయకుండా ఆంధ్రా ప్రజలను ప్రధాని నరేంద్ర మోదీ, ఏపీ ముఖ్యమంత్రి చంద్రబాబు మోసం చేశారని ఆరోపిస్తూ ఢిల్లీలోని సంసద్ మార్గ్ పోలీసు స్టేషన్లో ఆంధ్రా కాంగ్రెస్ నాయకులు కేసు పెట్టారు.