కర్నూలు, జూలై 14: రాష్ట్రంలో స్వచ్చ పంచాయితీ కార్యక్రమం కింద పారిశుద్ధ్య కార్యక్రమాన్ని విజయవంతంగా అమలు చేసే గ్రామాలకు ప్రోత్సాహక బహుమతులు ఇవ్వనున్నట్లు పంచాయితీరాజ్, ఐటిశాఖ మంత్రి నారా లోకేశ్ ప్రకటించారు. కర్నూలు కలెక్టర్ కార్యాలయంలో శుక్రవారం పంచాయితీరాజ్‌శాఖ అధికారులతో అభివృద్ధి కార్యక్రమాలపై మంత్రి సమీక్షించారు.

కాకినాడ, జూలై 14: రాష్ట్రంలోని పోలీసు స్టేషన్లన్నీ పార్టీ మార్పిడి కేంద్రాలుగా మారాయని వైఎస్సార్ కాంగ్రెస్ నేతలు ధర్మాన ప్రసాదరావు, అంబటి రాంబాబు విమర్శించారు. వైఎస్‌ఆర్ కాంగ్రెస్ పార్టీ కార్యకర్తలపై కేసులు పెట్టి, రౌడీషీట్లు తెరిచి, భయంతో వారిని అధికార పార్టీ సభ్యులుగా మార్చే కేంద్రాలుగా రాష్ట్రంలో పోలీసు స్టేషన్లు పనిచేస్తున్నాయన్నారు.

విజయవాడ, జూలై 14: లోటు బడ్జెట్‌లో ఉన్నప్పటికీ తెలుగుదేశం ప్రభుత్వం మేనిఫెస్టోలో ఇచ్చిన హామీల్లో ఈ మూడేళ్లలో 90 శాతానికి పైగా నెరవేర్చిందని రాష్ట్ర మంత్రి నక్కా ఆనంద్‌బాబు తెలిపారు. వైఎస్ హయాంలో మిగులు బడ్జెట్ ఉన్నప్పటికీ హామీల అమలులో ఘోరంగా విఫలమయ్యారని, 2014లో తెలుగుదేశం అధికారంలోకి వచ్చిన తర్వాత ఎన్నికల్లో హామీ ఇచ్చిన విధంగా రైతులకు రూ.24,500 కోట్ల రుణమాఫీ చేశామన్నారు.

విజయవాడ, జూలై 14: గిరిజన సంక్షేమ శాఖ విద్యా సంస్థల్లో రక్తహీనతతో బాధపడుతున్న విద్యార్థుల ఆరోగ్యం మెరుగుపరచటానికి ప్రతిపాదించిన ‘ఆదివాసి ఆరోగ్యం’ కార్యక్రమం అమలు చేసేందుకు గిరిజన సంక్షేమ శాఖ ప్రిన్సిపల్ సెక్రటరీ ఆర్.పి.సిసోడియా ఆదేశాలు జారీ చేశారు. ఈ కార్యక్రమం ద్వారా రక్తహీనత ఉన్నట్లు గుర్తించిన విద్యార్థులకు ప్రత్యేక ఆహారం, అవసరమైన మందులు ఏర్పాటు చేస్తారు.