తిరుమల, ఫిబ్రవరి 5: ఆధ్యాత్మిక కేంద్రమైన తిరుపతిలో పర్యాటక రంగాన్ని అభివృద్ధి చేయడానికి కేంద్ర ప్రభుత్వం దృష్టి సారిస్తోందని, ఈ క్రమంలో ఇక్కడ పాకశాస్త్ర వర్శిటీ (కల్నరి ఇనిస్టిట్యూట్)ను ఏర్పాటు చేయాలని నిర్ణయించామని కేంద్ర ప్రభుత్వ పర్యాటక కార్యదర్శి వినోదాజోషి తెలిపారు. శుక్రవారం ఆయన తిరుమల శ్రీ వెంకటేశ్వరస్వామిని దర్శించుకున్నారు.

కుప్పం, ఫిబ్రవరి 5: బెంగళూరునుంచి కన్యాకుమారికి వెళ్లే హైల్యాండ్ ఎక్స్‌ప్రెస్ కుప్పంకు సుమారు 40కిలోమీటరు దూరంలో తమిళనాడులోని పచ్చూరు వద్ద శుక్రవారం వేకువ జామున పట్టాలు తప్పింది. ఈ సంఘటనలో సుమారు 30మందికి గాయాలైయ్యాయి. బెంగళూరుకు వస్తున్న రైలు సోమనాయకన్‌పట్టి గ్రామ సమీపంలో పట్టాలు తప్పింది. రెండు రిజర్వేషన్ బోగిలు బోల్తాపడ్డాయి.

గుంటూరు, ఫిబ్రవరి 5: రాష్ట్ర ప్రణాళికాసంఘం ఉపాధ్యక్షుడు కుటుంబరావు రాక సమాచారాన్ని అందుకున్న వందలాది మంది రైతులు రుణమాఫీ జరగలేదంటూ శుక్రవారం తుళ్లూరు సిఆర్‌డిఎ కార్యాలయానికి చేరుకున్నారు. పత్రాలను పరిశీలించి న్యాయం చేస్తామంటూ ఉపాధ్యక్షుడు కుటుంబరావు పేర్కొన్నారు. అయితే రుణమాఫీ ఎందుకు జరగలేదనే విషయంపై సమాచారం కావాలంటూ రైతులు ప్రశ్నించారు.

విశాఖ: అంతర్జాతీయ నౌకా సమీక్ష సందర్భంగా విశాఖలో వివిధ దేశాల నౌకాదళ అధికారుల కోసం ఆతిథ్య కేంద్రాన్ని ఎ.పి. సి.ఎం. చంద్రబాబు శుక్రవారం ఉదయం ప్రారంభించారు. ఆధునిక వసతులతో స్టార్ హోటల్ తరహాలో ఏర్పాటుచేసిన ఈ కేంద్రంలో అధునాతన సౌకర్యాలను చూసి సి.ఎం. నేవీ అధికారులను ప్రశంసించారు. ఈ ఆతిథ్య కేంద్రంలో నుంచి విదేశీ నౌకాదళ అధికారులు సముద్రం అందాలను వీక్షించేందుకు ఏర్పాట్లు చేశారు.