తిరుమల: టీటీడీ ఆర్జిత సేవ, దర్శనం టిక్కెట్ల కేటాయింపులో భారీ అవినీతి జరిగిందని టీటీడీ పాలకమండలి మాజీ శాసనసభ్యుడు భానుప్రకాశ్‌రెడ్డి ఆరోపించారు. ఆయన విజయవాడలో మీడియా సమావేశంలో మాట్లాడుతూ టిక్కెట్ల వ్యవహారంలో జరిగిన అవినీతిపై సమగ్ర దర్యాప్తు జరిపించాలని లేదంటే కోర్టును ఆశ్రయిస్తామని వెల్లడించారు.

విజయనగరం: ఉత్తరాంధ్రుల ఇలవేల్పు శ్రీపైడితల్లి సిరిమానోత్సవం వైభవంగా ఆరంభమైంది. మధ్యాహ్నాం మూడు గంటల నుంచి మూడు లాంతర్ల నుంచి కోట వరకు జరిగింది. లక్షలాది మంది భక్తులు వేకువ జాము నుంచే ఉత్సవాన్ని తిలకించేందుకు వచ్చారు. ఉత్సవం సాఫీగా సాగేందుకు అధికారులు అన్ని ఏర్పాట్లు చేశారు.

గుంటూరు:ఓటు కోసం కళాశాల విద్యార్థులు ఉత్సాహంగా ముందుకు వచ్చి నమోదు చేసుకున్నారు. జిల్లా వ్యాప్తంగా 560 కళాశాలల విద్యార్థులు ఓటు కోసం తమ పేర్లను నమోదు చేసుకున్నారని జిల్లా కలెక్టర్ శశిధర్ వెల్లడించారు. ఓటు నమోదుపై మరింత అవగాహన కల్పించేందుకు పోలీసు పరేడ్ మైదానంలో హాట్ ఎయిర్ బెలూన్ కార్యక్రమాన్ని నిర్వహిస్తున్నట్లు కలెక్టర్ తెలిపారు.

విశాఖపట్నం, అక్టోబర్ 22: తిత్లీ తుపాను బాధితులను ఆదుకోవడంలో ముఖ్యమంత్రి పూర్తిగా విఫలమయ్యారని జనసేన అథినేత పవన్ కళ్యాణ్ అన్నారు. సోమవారం ఇక్కడ ఏర్పాటు చేసిన విలేఖరుల సమావేశంలో ఆయన మాట్లాడుతూ తుపానులో నష్టపోయిన వారు ఇంకా కోలుకోకముందే, తుపాను ప్రాంతాల్లో పరిస్థితి అంతా మెరుగుపడిందని ముఖ్యమంత్రి ప్రచార విన్యాసాలు చేయడం వలన, సాయం అందించడానికి కేంద్రం ముందుకు రావడం లేదన్నారు.