విజయవాడ: ఇంద్రకీలాద్రిపై ఎనిమిదో రోజున అమ్మవారు దుర్గాదేవి రూపంలో భక్తులకు దర్శనమిస్తున్నారు. దసరా ఉత్సవాల్లో అష్టమి రోజుని దుర్గాష్టమిగా వ్యవహరిస్తారు. వివిధ ప్రాంతాల నుంచి తరలివచ్చిన భక్తులతో ఇంద్రకీలాద్రిపై రద్దీ పెరిగింది. అదే సమయంలో దీక్ష విరమణ కోసం భవానీలు పెద్ద సంఖ్యలో తరలివచ్చారు. తెల్లవారుజామున 3గంటల నుంచి భక్తులను దుర్గమ్మ దర్శనానికి అనుమతించారు.

విజయనగరం, అక్టోబర్ 16: జిల్లాను నిన్న మొన్నటి వరకు డెంగ్యూ పట్టిపీడించగా, తాజాగా స్వైన్‌ఫ్లూ వ్యాధి ప్రజలను కలవరపెడుతోంది. ఇప్పటికే స్వైన్ ఫ్లూ వ్యాధి బారిన పడి ఇద్దరు మృతి చెందడంతో జిల్లావాసులు ఆందోళన చెందుతున్నారు. జిల్లాలోని సాలూరు పట్టణానికి చెందిన బోనుమంతి వౌనిక (24) అలియాస్ సంతోషి స్వైన్‌ఫ్లూ వ్యాధితో విశాఖలోని చెస్ట్ ఆసుపత్రిలో మృతి చెందింది.

విజయవాడ, అక్టోబర్ 16: తిత్లీ తుపాను కారణంగా శ్రీకాకుళం జిల్లాలో 3435 కోట్ల రూపాయల మేర నష్టం వాటిల్లిందని కేంద్ర హోం శాఖ మంత్రి రాజ్‌నాథ్ సింగ్‌కు ముఖ్యమంత్రి చంద్రబాబు నాయుడు తెలిపారు. అదే విధంగా విభజన హామీలు అమలు చేయాలని కూడా కోరారు. ఈ మేరకు రాష్ట్ర మంత్రులు, ఎంపీలతో కూడిన బృందం గన్నవరం విమానాశ్రయంలో మంగళవారం రాత్రి కేంద్ర మంత్రిని కలిసి ముఖ్యమంత్రి రాసిన లేఖలను అందచేశారు.

జంగారెడ్డిగూడెం, అక్టోబర్ 16: శరన్నవరాత్రి ఉత్సవాల్లో భాగంగా పశ్చిమ గోదావరి జిల్లా జంగారెడ్డిగూడెంలోని శ్రీ గంగానమ్మ అమ్మవారికి మంగళవారం రూ.99 లక్షల కొత్త కరెన్సీ నోట్లతో అలంకారం చేశారు. మహాలక్ష్మీదేవి రూపం కావడంతో ప్రత్యేకంగా కరెన్సీ నోట్లతో అలంకారం చేపట్టారు. కరెన్సీ నోట్లతో పాటు వెండి, బంగారు ఆభరణాలతో అమ్మవారికి అలంకరణ చేశారు.