ఓర్వకల్లు, జూలై 17:మండల పరిధిలోని శకునాల గ్రామం రైతులకు నష్టపరిహారం అందే వరకూ సోలార్ పవర్ ప్రాజెక్టు పనుల్లో భాగంగా నిర్మిస్తున్న పవర్ గ్రిడ్ నిర్మాణ పనులను కొనసాగనివ్వమని పాణ్యం డివిజన్ సిపిఎం నేత రామకృష్ణ ఆదివారం ఒక ప్రకటనలో హెచ్చరించారు. ప్రాజెక్టు పనులను గ్రామానికి చెందిన రైతులు ప్రతి రోజూ అడ్డుకుంటున్నా అధికారులు పని ప్రారంభించడానికి సిద్ధం కావటం శోచనీయమన్నారు.

సంజామల, జూలై 17: ఈతకు వెళ్లి విద్యార్థి మృతిచెందిన సంఘటన ఆదివారం సంజామలలో చోటు చేసుకుంది. గ్రామానికి చెందిన దూదేకుల కుళ్లాయి, పర్వీన దంపతుల ఏకైక కుమారుడు రాజ్‌కుళ్లాయి(16) గనిగుంతలో ఈత కొట్టడానికి వెళ్లి మృతిచెందాడు. రాజ్‌కుళ్లాయి స్థానిక జిల్లా పరిషత్ ఉన్నత పాఠశాలలో 10వ తరగతి చదువుతున్నాడు.

ఎల్ ఎన్‌పేట, జూలై 17: మండలంలోని ఎల్ ఎన్‌పేట గ్రామ పంచాయతీ పరిధిలోని పెద్దకోట గ్రామంలో అతిసార వ్యాధితో తల్లీకూతురు మృతిచెందారు. శనివారం రాత్రి జన లక్ష్మి (55), మృతి చెందగా ఆమె కుమార్తె డి.రమణమ్మ (35) ఆదివారం మృతి చెందింది. ఆగ్రామానికి చెందిన పది మంది అస్వస్థతకు గురయ్యారు. దీంతో గ్రామంలో ఆందోళనలు నెలకొన్నాయి. ఆదివారం పాతపట్నం ఎమ్మెల్యే కలమట వెంకటరమణ గ్రామాన్ని సందర్శించారు.

కోటబొమ్మాళి, జూలై 17: ప్రభుత్వ వసతిగృహాల విద్యార్థుల సంక్షేమానికి ఎనలేని ప్రాధాన్యత ఇస్తోందని రాష్ట్ర కార్మిక, ఉపాధి శాఖ మంత్రి కింజరాపు అచ్చెన్నాయుడు చెప్పారు. ఆదివారం నిమ్మాడలో మంత్రి క్యాంపు కార్యాలయంలో అచ్చెన్న అధ్యక్షతన నియోజకవర్గస్థాయి వసతిగృహాల సలహా కమిటీ సమావేశం నిర్వహించారు. హాస్టళ్ల పరిధిలోని నిర్వహిస్తున్న వసతిగృహాలకు పూర్వ వైభవం తీసుకురావడానికి కృషి చేయాలని కోరారు.