బాలకృష్ణ తనయుడు నందమూరి మోక్షజ్ఞ సినీ రంగ ప్రవేశానికి రంగం సిద్ధమైంది. ఎప్పటి నుంచో మోక్షజ్ఞ కోసం ఓ జానపద కథను అనే్వషిస్తున్న సంగతి తెలిసిందే. గౌతమిపుత్ర శాతకర్ణి హిట్ అయిన నేపథ్యంలో శాతకర్ణి కుమారుడు పులోమావి కథను తెరపై ఆవిష్కరించనున్నారు. ఈ చిత్రంలో పులోమావిగా మోక్షజ్ఞ నటిస్తారట. శాతకర్ణి సినిమా అంతా యుద్ధ నేపథ్యంలో వున్నది కనుక పులోమావి కథను ప్రేమాయణం నేపథ్యంలో చిత్రీకరిస్తాని భోగట్టా.

క్లాప్స్ అండ్ విజిల్స్ ఎంటర్‌టైన్‌మెంట్స్ పతాకంపై మంచు మనోజ్ హీరోగా, ప్రగ్యా జైస్వాల్ హీరోయిన్‌గా ఎస్.కె.సత్య తెరకెక్కిస్తున్న చిత్రం ‘గుంటూరోడు’ ఆడియో విడుదల నేడు జరగనుంది. ఫిబ్రవరిలో సినిమాను విడుదల చేస్తారు. రాజేంద్రప్రసాద్, కోట శ్రీనివాసరావు, రావు రమేష్, సంపత్, పృధ్వి, ప్రవీణ్, సత్య, జెమినీ సురేష్, కావీ విశ్వనాథ్ తదితరులు నటిస్తున్నారు.

కన్నడ చిత్రం ‘యూ టర్న్’ రీమేక్‌లో నటించడానికి సమంత ఓకే చెప్పింది. క్రైమ్, థ్రిల్లర్‌గా రూపొందిన ఈ చిత్రం రీమేక్‌కు సంబంధించి చిత్ర దర్శకుడు పవన్‌కుమార్ బెంగళూరులో చర్చలు జరుగుతున్నాయి. తాజా సమాచారం ప్రకారం ఈ చిత్రం రీమేక్ త్వరలో ప్రారంభం కానుంది. ఒరిజినల్ వెర్షన్‌కు దర్శకత్వం వహించిన పవన్‌కుమారే రీమేక్‌కు కూడా దర్శకత్వం వహించనున్నాడు. ప్రస్తుతం సమంత రెండు తమిళ చిత్రాల్లో నటిస్తోంది.

జల్లికట్టుపై నిషేధాన్ని ఎత్తివేయాలంటూ పెల్లుబికిన నిరసనలను ఎలాగైనా ఆపాలని ప్రభుత్వం చేస్తున్న చర్యలను అందరూ ఖండించాలని ప్రముఖ నటుడు కమల్ హాసన్ పిలుపునిచ్చారు. జల్లికట్టును అనుమతించాలంటూ చేస్తున్న ఆందోళనలో భాగంగా ఓ వీడియోను ఆయన ట్విట్టర్‌లో పోస్ట్ చేశారు.