నేపిటా, మే 11: ఇండియా మయన్మార్ దేశాలు ఏడు అంశాలపై ఒప్పందాలు చేసుకున్నాయి. రెండు రోజుల పర్యటనలో భాగంగా భారత విదేశాంగ మంత్రి సుష్మాస్వరాజ్ ఆ దేశ ప్రతినిధులతోశాంతి భద్రతలు, అభివృద్ధి, రెకినే రాష్ట్రంలోని రోహింగ్యా ముస్లింలు బంగ్లాదేశ్‌కు తరలిపోవడం తదితర అంశాలపై చర్చించారు. గురువారం మయన్మార్ చేరుకున్న సుష్మా ఆ రాష్ట్ర కౌన్సిలర్ అంగ్‌సాన్‌సూకితో శుక్రవారం చర్చలు జరిపారు.

న్యూ ఢిల్లీ, మే 11: సామూహిక అత్యాచారాలకు గురైన యువతులకు రూ.5 నుంచి రూ.10 లక్షల వరకు నష్టపరిహారం ఇవ్వాలన్న జాతీయ లీగల్ సర్వీసస్ అథారిటీ ప్రతిపాదనకు సుప్రీం కోర్టు ఆమోదం తెలిపింది. దేశంలోని అన్ని రాష్ట్రాలు ఈ నష్టపరిహారం చెల్లించే విధంగా లీగల్ సర్వీసస్ అథారిటీ ప్రతిపాదనలు రూపొందించింది.

బెంగళూరు: కర్నాటకలో అసెంబ్లీ ఎన్నికల్లో బీజేపీ తరపున పోటీచేస్తున్న గాలి జనార్థన్ రెడ్డి బంధువు శ్రీరాములుపై అనర్హత వేటు వేయాలని కాంగ్రెస్ పార్టీ ఈసీకి ఫిర్యాదు చేసింది. ఓబులాపురం గనుల కేసు తీర్పు గాలి జనార్థన్‌రెడ్డికి అనుకూలంగా ఇచ్చేందుకు రూ.500 కోట్లతో చీఫ్ జస్టిస్ బంధువుతోడీల్ మాట్లాడుతున్న వీడియో బయటకు రావటంతో ఇక్కడ సంచలనం కలిగింది. ఈ వీడియో 2010నాటిదని వెల్లడైంది.

బెంగళూరు: కర్నాటకలో ఎన్నికల ప్రచారం ముగియటంతో అక్కడ ఓటర్లకు గాలం వేసే పనిలో నేతలు ఉన్నారు. తనిఖీల్లో ఇప్పటి వరకు 80.19 కోట్ల విలువైన నగదు, 24,36కోట్ల రూపాయలు విలువైన మద్యాన్ని స్వాధీనం చేసుకున్నారు. అలాగే 44.26 కోట్ల విలువైన బంగారం, వెండిని స్వాధీనం చేసుకున్నారు. తాజాగా చిత్రదుర్గ జిల్లా మొలకల్మూరులోని ఎద్దల బొమ్మన పట్టి వద్ద రూ.2.17 కోట్ల విలువైన నగదుదు స్వాధీనం చేసుకున్నారు.