థానే: థానే షాపింగ్ మాల్ వద్ద చిరుత సంచరించినట్లు సీసీటీవీ ఫుటేజీలో కనిపించింది. బుధవారం తెల్లవారుజామున ఈ చిరుత షాపింగ్ మాల్ వద్దకు వచ్చి అక్కడ నుంచి మాల్ ప్రహారీ గోడ దూకిందని షాపింగ్ మాల్ మేనేజర్ వెల్లడించారు. అప్రమత్తమైన అటవీశాఖ అధికారులు చిరుత తిరుగాడిన ప్రాంతాలను పరిశీలించారు. వసంతవిహార్ నివాస్ ప్రాంతంలో కూడా చిరుత తిరిగినట్లు అధికారులు గుర్తించారు.

జమ్మూకాశ్మీర్: కాల్పుల విరమణ ఒప్పందాన్ని ఉల్లంఘిస్తూ పాక్ కవ్వింపు చర్యలకు పాల్పడుతుండటంతో ఎల్‌వోసీ వద్ద భారత బలగాలు భారీగా మోహరించాయి. సరిహద్దు ప్రాంతాల్లో సైన్యం అలెర్ట్ అయింది. కాల్పుల విరమణ ఒప్పందానికి తూట్లు పొడుస్తూ పాక్‌సైన్యం పలుచోట్ల కాల్పులు జరుపుతున్నాయి. మన జవాన్లు ధీటుగా సమాధానం ఇస్తున్నారు. పూల్వామా ఉగ్రదాడి నేపథ్యంలో సరిహద్దు ప్రాంతంలో అప్రకటిత ఎమర్జెన్సీ నడుస్తోంది.

న్యూఢిల్లీ: పుల్వానా ఘటనలో పాకిస్తాన్ ప్రమేయం ఉన్నదని చెప్పేందుకు బలమైన ఆధారాలు ఉన్నాయని కేంద్రం ప్రకటించింది. ఈ విషయాన్ని పాక్‌కు తెలియచేసినట్లు కేంద్ర మంత్రి రాజ్యవర్ధన్ సింగ్ రాథోర్ చెప్పారు. ఈ ఘటనలో పాక్ ప్రమేయం ఉన్నట్లు ఆధారాలు చూపిస్తే, తమ దేశంలో ఉన్నబాధ్యులపై చర్యలు తీసుకుంటామని ఆ దేశ ప్రధాని ఇమ్రాన్ ఖాన్ ప్రకటించిన విషయం విదితమే.

వారణాసి (యూపీ), ఫిబ్రవరి 19: సమాజంలో కులపరమైన అసమానతలను పారద్రోలాలని, అప్పుడు సమసమాజ స్థాపన సాధ్యమని ప్రధానమంత్రి నరేంద్రమోదీ పిలుపునిచ్చారు. భక్తి ఉద్యమ నిర్మాతల్లో ఒకరైన సంత్ రవిదాస్ గొప్ప యోగి పుంగవుడు, సంస్కరణవాది అని ఆయన నివాళులు అర్పించారు. సామాజిక దురాచారాలను తరిమిగొట్టాలని, మానవులంతా ఒక్కటేనన్న లక్ష్యసాధనకు నిరంతరం కృషి చేసిన మహానుభావుడు సంత్ రవిదాస్ అన్నారు.