జమ్ము, ఫిబ్రవరి 20: పుల్వానా ఉగ్రవాది దాడికి వ్యతిరేకంగా చేపట్టిన నిరసన కార్యక్రమంలో పాల్గొన్న వంద మంది డోగ్రా కాశ్మీర్ యువకులను వెంటనే విడుదల చేయాలని జమ్ము ప్రొవిన్స్ పీపుల్స్ ఫోరం డిమాండ్ చేసింది. దాదాపు వంద మంది యువకులను పోలీసులు నిర్బంధించారన్నారు. వీరంతా అమాయకులని, దేశ భక్తితో ధర్నా చేస్తుంటే పోలీసులు అదుపులోకి తీసుకుని ఇంతవరకు వదిలిపెట్టలేదన్నారు.

బెంగళూరు, ఫిబ్రవరి 20: భారతదేశంలోని వైమానిక, రక్షణ పరికరాల తయారీ రంగాల్లో పెట్టుబడులకు విస్తృత అవకాశాలు ఉన్నాయని, ఇందులో పెట్టుబడులు పెట్టి, భాగస్వాములు కావడానికి పెట్టుబడిదారులు పెద్దయెత్తున ముందుకు రావాలని కేంద్ర రక్షణ శాఖ మంత్రి నిర్మలా సీతారామన్ ఆహ్వానం పలికారు. బెంగళూరులోని యెలహంక ఎయిర్‌బేస్‌లో బుధవారం ఎయిర్‌షో ప్రారంభోత్సవ కార్యక్రమంలో ఆమె మాట్లాడారు.

న్యూఢిల్లీ, ఫిబ్రవరి 20: పాకిస్తాన్‌ను పొగడ్తలతో ముంచెత్తిన సౌదీ అరేబియా రాజు సల్మాన్‌ను మన ప్రధాని నరేంద్రమోదీ విమానాశ్రయానికి వెళ్లి స్వాగతం పలకడంపై కాంగ్రెస్ పార్టీ తీవ్ర అభ్యంతరం వ్యక్తం చేసింది. ఉగ్రవాదానికి పురిటి గడ్డ పాకిస్తాన్‌ను ఆకాశానికి ఎత్తేసిన సౌదీ రాజుకు ఇంత మర్యాద చేయడం మోదీకి తగదన్నారు.

న్యూఢిల్లీ, ఫిబ్రవరి 20: పుల్వామా దాడి కారణంగా పాకిస్తాన్‌తో ఏర్పడిన ఉద్రిక్త పరిస్థితుల దృష్ట్యా లోక్‌సభ ఎన్నికల షెడ్యూల్ ప్రకటన వారం పది రోజులు ఆలస్యం కావచ్చునని ప్రభుత్వ వర్గాలు అనధికారికంగా చెబుతున్నాయి. లోక్‌సభ ఎన్నికల షెడ్యూల్ ఫిబ్రవరి ఆఖరు వారం లేదా మార్చి మొదటి వారంలో విడుదల కావచ్చునని కేంద్ర ఎన్నికల సంఘం అధికారులు చెప్పటం తెలిసిందే.