భోపాల్/ఇండోర్, అక్టోబర్ 30: తనను పన్ను ఎగవేతదారుడని నిందించడమే కాకుండా తన పేరు పనామా పేపర్ల జాబితాలో ఉన్నట్లు ఏఐసీసీ అధ్యక్షుడు రాహుల్ గాంధీ ఆరోపించడం తగదని మధ్యప్రదేశ్ ముఖ్యమంత్రి శివరాజ్ సింగ్ చౌహాన్ కుమారుడు కార్తికేయ అన్నారు. స్ధానిక కోర్టులో క్రిమినల్ కేసు కింద పరువునష్టం దావా దాఖలు చేసినట్లు ఆయన చెప్పారు. తనను ఉద్దేశ్యపూర్వకంగా ఏఐసీసీ అధ్యక్షుడు రాహుల్ గాంధీ కించపరిచారన్నారు.

న్యూఢిల్లీ, అక్టోబర్ 30: ప్రధాన మంత్రి నరేంద్ర మోదీ ఇటలీ ప్రధాని గియసెప్పే కాంటేతో మంగళవారం నాడిక్కడ భేటీ అయ్యారు. ఇరు దేశాల మధ్య వాణిజ్యాభివృద్ధి, వివిధ రంగాల్లో పెట్టుబడుల వంటి ప్రధాన అంశాలపై ఈ సందర్భంగా ఇద్దరి మధ్య చర్చలు సాగాయి. ఇటలీ ప్రధాన మంత్రి కాంటే మంగళవారం ఉదయం ఇక్కడుకు చేరుకోగా భారత ప్రధాని మోదీ ఆయనకు సాదర స్వాగతం పలికారు.

న్యూఢిల్లీ, అక్టోబర్ 30: ఢిల్లీలో వాతావరణ కాలుష్య తీవ్రత రికార్డు స్థాయిలో నమోదుకావడంతో ప్రజలు అప్రమత్తంగా ఉండాలని కేంద్ర కాలుష్య నియంత్రణ మండలి హెచ్చరించింది. పొరుగు రాష్ట్రాల్లో రైతులు పొలాల్లో పంట ఉత్పత్తుల చెత్తను కాల్చుతున్నారు. దీంతో వాయు నాణ్యత సూచిక 401 నమోదైంది. ఈ సీజన్‌లో గరిష్ట స్థాయిలో నమోదు కావడం ఇది తొలిసారి.

న్యూఢిల్లీ: దీపావళి పండుగ రోజుబాణా సంచాను కాల్చేందుకు సంబంధించి తమిళనాడు, పాండిచ్ఛేరి ప్రభుత్వాలు తమకు అనుకూలమైన వేళలను నిర్ణయించుకోవచ్చని సుప్రీంకోర్టు పేర్కొంది. కాని రెండు గంటలకు మించి సమయం ఇవ్వరాదని స్పష్టం చేసింది. దీపావళి రోజు రాత్రి 8 గంటల నుంచి 10 గంటల వరకు మాత్రమే బాణా సంచాను కాల్చేందుకు సుప్రీంకోర్టు అనుమతి ఇచ్చిన విషయం విదితమే.