విశాఖపట్నం, జూలై 21: ఒడిశా, తమిళనాడు, పశ్చిమ మధ్య బంగాళాఖాతాన్ని అనుకుని ఉపరితల ఆవర్తనం గురువారం ఏర్పడింది. దీని ప్రభావంతో రానున్న 24 గంటల్లో కోస్తాంధ్రలో పలు చోట్ల వర్షం కురిసే అవకాశం ఉందని విశాఖలోని తుపాను హెచ్చరికల కేంద్రం అధికారులు గురువారం రాత్రి తెలిపారు. ఆవర్తనానికి రుతుపవనాల ప్రభావం తోడవటంతో శనివారం మరిన్ని ప్రాంతాల్లో వర్షం కురిసే అవకాశం ఉందని అధికారులు తెలిపారు.

కర్నూలు, జూలై 21: జూరాలలో విద్యుదుత్పత్తి అనంతరం గురువారం దిగువకు 11 వేల క్యూసెక్కుల నీరు విడుదల చేశారు. ఈ నీరు శుక్రవారం నాటికి శ్రీశైలం జలాశయం చేరుకుంటుందని అధికారులు భావిస్తున్నారు. ఎగువ ప్రాంతంలో కురుస్తున్నా వర్షాలతో ఆల్మట్టి, నారాయణపూర్ జలాశయాలు నిండిపోయాయి. దీంతో దిగువకు విడుదల చేసిన నీరు జూరాలకు చేరుకుంటోంది. గురువారం ఎగువ నుంచి జూరాలకు 58,485 క్యూసెక్కుల నీరు వచ్చింది.

గుంటూరు, జూలై 21: వచ్చే నెల 12 నుంచి జరిగే కృష్ణా పుష్కరాలను రాష్ట్ర ప్రభుత్వం ప్రతిష్ఠాత్మకంగా తీసుకున్న నేపథ్యంలో గుంటూరు, కృష్ణా, కర్నూలు జిల్లాలో ఆర్‌అండ్‌బి పరిధిలోని రహదారుల అభివృద్ధికి 300 కోట్ల రూపాయలు కేటాయించినట్లు రవాణాశాఖ మంత్రి శిద్దా రాఘవరావు వెల్లడించారు.

విజయవాడ : ముఖ్యమంత్రి చంద్రబాబు నాయుడు పాలన ఇతి వృత్తంగా ‘చంద్రోదయం’ పేరుతో నిర్మించే సినిమాకి సంబంధించిన పోస్టర్‌ను గురువారం ఆవిష్కరించారు. చంద్రబాబు చేసిన అభివృద్ధి పనులు, ప్రవేశపెట్టిన సంక్షేమ పథకాల ఆధారంగా ఈ సినిమా తీస్తున్నట్లు దర్శక, నిర్మాతలు చెప్పారు.