విశాఖ: స్పోర్ట్సు కాంప్లెక్స్ నిర్మాణంపై కథలు ఎందుకు చెబుతారంటూ ఎపి సిఎం చంద్రబాబు ఈరోజు ఇక్కడ విశాఖ స్టీల్‌ప్లాంట్ సిఎండి మధుసూదనరావుపై ఆగ్రహం వ్యక్తం చేశారు. ఏడాదిలోగా అరకులో స్పోర్ట్సు కాంప్లెక్స్ నిర్మాణం పూర్తికావాలన్నారు. విశాఖ జిల్లాలో అభివృద్ధి పథకాల అమలుతీరుపై అధికారులతో జరిగిన సమీక్షా సమావేశంలో ఆయన మాట్లాడారు.

విజయవాడ: ఈ ఏడాది కృష్ణానది పుష్కరాలకు అదనపు బస్సులతో పాటు మరిన్ని సౌకర్యాలను ఏర్పాటు చేసేందుకు తమ సంస్థ కృషి చేస్తోందని ఎపిఎస్ ఆర్టీసీ ఎండి సాంబశివరావు తెలిపారు. ఆయన ఇక్కడి జవహర్‌లాల్ నెహ్రూ బస్ స్టేషన్‌లో సోమవారం ఉదయం జ్యోతిరావు పూలే జయంతి సభలో పాల్గొన్నారు. ఈ సందర్భంగా ఆర్టీసీ చేస్తున్న సేవలను వివరించారు. పుష్కరాల సందర్భంగా నగర శివార్లలో ప్రత్యేకంగా ఒక బస్టాండ్‌ను ఏర్పాటు చేస్తామన్నారు.

విశాఖ: విశాఖ జిల్లా నక్కపల్లి వద్ద ఆదివారం కారు ప్రమాదంలో 11 మంది మరణించడం బాధాకరమని, మృతుల కుటుంబాలకు రెండు లక్షల చొప్పున ఎక్స్‌గ్రేషియా మంజూరు చేస్తున్నట్లు ఎపి సిఎం చంద్రబాబు సోమవారం ఇక్కడ ప్రకటించారు. బుచ్చిరాజుపాలెంలో మృతుల కుటుంబాలను ఆయన పరామర్శించి వారికి ధైర్యం చెప్పారు.

విశాఖ: బడుగువర్గాల అభ్యున్నతి కోసం పరితపించిన జ్యోతిరావు పూలే ఆశయాలు నేటి తరానికి స్ఫూర్తిదాయకమని ఎపి సిఎం చంద్రబాబు అన్నారు. విశాఖ ఎయులో సోమవారం ఉదయం పూలే 190వ జయంతి ఉత్సవాల్లో ఆయన పాల్గొన్నారు. పూలే విధానాలను అనుసరించి అలనాడు టిడిపి వ్యవస్థాపకుడు ఎన్టీఆర్ బడుగువర్గాల కోసం పలు సంక్షేమ పథకాలను ప్రారంభించారని ఆయన గుర్తు చేశారు.