హైదరాబాద్: ప్రివిలేజ్ కమిటీ సమావేశానికి హాజరుకావాలంటూ ఒకరోజు ముందు లేఖ ఇస్తే తాను ఎలా హాజరుకావాలని వైకాపా ఎమ్మెల్యే రోజా ప్రశ్నించారు. శనివారం తాను అస్వస్థతకు గురై ఆస్పత్రిలో చేరడం వల్ల ప్రివిలేజ్ కమిటీ సమావేశానికి హాజరుకాలేక పోయానని ఆమె చెప్పారు. కోర్టు ఆదేశాలున్నప్పటికీ తనను రెండు రోజులుగా అసెంబ్లీ సమావేశాలకు రానీయకుండా అడ్డుకున్నారని ఆమె తెలిపారు.

హైదరాబాద్: అస్వస్థతకు గురైన వైకాపా ఎమ్మెల్యే, సినీనటి రోజాకు శనివారం నిమ్స్‌లో వైద్యులు ఆరోగ్యపరీక్షలు నిర్వహించారు. ప్రస్తుతం ఆమె ఆరోగ్య పరిస్థితి నిలకడగా ఉందని, సుగర్, బీపీ స్థాయి సాధారణంగానే ఉందని డాక్టర్లు తెలిపారు. పూర్తిగా కోలుకున్న తర్వాత ఆమెను ఆస్పత్రి నుంచి డిశ్చార్చి చేస్తామని వైద్యులు చెప్పారు.

నెల్లూరు: తమ కుమార్తె వౌనిక మృతికి భర్త, అత్త కారకులని ఆరోపిస్తూ మృతురాలి తల్లిదండ్రులు, బంధువులు అత్తింటివారిపై దాడికి దిగి బీభత్సం సృష్టించారు. నెల్లూరు జిల్లా టి.గూడూరు మండలం పాపిరెడ్డిపాలెంలో వౌనిక అనే వివాహిత ఈ నెల 15న అత్తవారింట్లో మరణించింది. భర్త అశోక్, అత్త సుబ్బమ్మ దారుణంగా కొట్టడం వల్లే వౌనిక మరణించిందని మృతురాలి బంధువులు శనివారం ఉదయం దాడికి దిగారు.

గుంటూరు: వినుకొండలో శనివారం ఉదయం ఓ వివాహిత ఆత్మహత్య చేసుకుంది. అయిదు నెలల క్రితం వివాహం చేసుకున్న ఆమె ఆత్మహత్యకు పాల్పడడం స్థానికంగా సంచలనం సృష్టించింది. కాగా, అత్తింటి వేధింపుల కారణంగానే ఈ దుర్ఘటన జరిగిందని మృతురాలి తల్లిదండ్రులు ఆరోపిస్తున్నారు.