విజయవాడ: వచ్చే ఏడాది చివరినాటికి పోలవరం సాగునీటి ప్రాజెక్టు తొలి దశ నిర్మాణం పూర్తవుతుందని ఎపి ఇరిగేషన్ మంత్రి దేవినేని ఉమా తెలిపారు. ఆయన ఆదివారం ఇక్కడి ప్రకాశం బ్యారేజీ యాప్రాన్ ఆధునీకరణ పనుల తీరును పరిశీలించిన తర్వాత విలేఖరులతో మాట్లాడుతూ, పోలవరాన్ని పూర్తి చేసిన నేతగా సిఎం చంద్రబాబు పేరు చరిత్రలో చిరస్థాయిగా ఉంటుందన్నారు.

గుంటూరు (కల్చరల్): సంఘంలో నానాటికీ తరగిపోతున్న ఉత్తమ మానవీయ విలువల పునరుద్ధరణకు ప్రతి ఒక్కరూ నడుంబిగించాలని సుప్రీం కోర్టు న్యాయమూర్తి జస్టిస్ జాస్తి చలమేశ్వర్ పిలుపునిచ్చారు. శనివారం రాత్రి నగరంలోని శ్రీ వెంకటేశ్వర విజ్ఞాన మందిర ప్రాంగణంలో బొమ్మిడాల శ్రీకృష్ణమూర్తి ఫౌండేషన్ స్ఫూర్తి అవార్డుల ప్రదానోత్సవంలో ప్రసంగించారు.

హైదరాబాద్: ప్రభుత్వ పాఠశాలలకు వెళ్లే పిల్లలకు వారి సామర్థ్యానికి మించి పుస్తకాలను పాఠ్యాంశాలుగా చేర్చలేదని మానవ వనరుల మంత్రి గంటా శ్రీనివాసరావు తెలిపారు. శాసనమండలిలో శనివారం ప్రశ్నోత్తరాల సమయంలో టిడిపి సభ్యుడు ఎంవివిఎస్ మూర్తి తదితరులు అడిగిన ప్రశ్నలకు సమాధానం చెబుతూ, ఒకటి, రెండు తరగతులకు మూడు పాఠ్యపుస్తకాలు, మూడు, నాలుగు, ఐదు తరగతులకు నాలుగు పుస్తకాలు ఉన్నాయన్నారు.

విజయనగరం, మార్చి 19: ప్రముఖ పుణ్యక్షేత్రం రామతీర్థాన్ని ప్రభుత్వం అభివృద్ధి చేయాలని ఉత్తరాంధ్ర సాధు పరిషత్ అధ్యక్షుడు శ్రీనివాసానంద సరస్వతీ స్వామీజీ పేర్కొన్నారు. విజయనగరంలో శనివారం ఏర్పాటు చేసిన విలేఖరుల సమావేశంలో ఆయన మాట్లాడుతూ గత సంవత్సరం రామతీర్థం అభివృద్ధికి ప్రభుత్వం 1.70 కోట్ల రూపాయలను ప్రకటించిందని, కానీ ఇప్పటి వరకు ఒక్క రూపాయి కూడా మంజూరు చేయలేదని ఆవేదన వ్యక్తం చేశారు.