చిత్తూరు: చిత్తూరు నగరంలోని 36వ డివిజన్ కార్పొరేటర్ శివప్రసాద్ రెడ్డి (46) గురువారం ఆత్మహత్య చేసుకున్నారు. చిత్తూరు మేయర్ కఠారి అనూరాధ, కఠారి మోహన్ దంపతుల హత్య కేసులో అనవసరంగా తనను ఇరికించేందుకు పోలీసులు ప్రయత్నిస్తున్నారని భావించిన శివ ప్రసాద్ రెడ్డి మనోవేదనకు గురై ఇంటికి వస్తూనే గదిలో ఫ్యానుకు చీరతో ఉరివేసుకుని ఆత్మహత్య చేసుకున్నారు.

విజయవాడ: విజయవాడలో కాల్‌మనీ వ్యవహారం వెలుగు చూసిన నేపథ్యంలో గురువారం మూడో రోజు కూడా రాష్టవ్య్రాప్తంగా వడ్డీ వ్యాపారుల ఇళ్లపై పోలీసులు దాడులు చేస్తున్నారు. మదనపల్లిలో ఐదుగురిని, చీరాలలో ఒకరిని అరెస్టు చేశారు. భారీఎత్తున ప్రామిసరీ నోట్లు, డాక్యుమెంట్లను స్వాధీనం చేసుకున్నారు.

విశాఖ: ఓ కేసులో తనను పట్టుకొనేందుకు వచ్చిన పోలీసులను చూసి భయపడిన ఓ వ్యక్తి నాలుగో అంతస్తు నుంచి కిందకి దూకి ఆత్మహత్య చేసుకున్నాడు. ఎం.వి.పి. కాలనీ సెక్టర్ 4లో గురువారం ఈ ఘటన జరిగింది. మృతుడు హైదరాబాద్ మలక్‌పేట నివాసి అనీ, ఓ కేసు సందర్భంగా అతణ్ణి పోలీసులు ప్రశ్నించేందుకు వచ్చారని తెలిసింది.

విజయవాడ: క్రిస్మస్ సందర్భంగా క్రైస్తవులకు నిత్యావసర సరకులను ఉచితంగా అందజేసేందుకు చంద్రన్న పేరిట ఎ.పి. ప్రభుత్వం గిఫ్ట్ ప్యాక్‌లను పంపిణీ చేసేందుకు సిద్ధం చేసింది. గిఫ్ట్ ప్యాక్‌లో కిలో గోధుమపిండి, అరకిలో కందిపప్పు, వంద గ్రాముల నెయ్యి, శనగపప్పు, బెల్లం, పామాయిల్ వంటివి ఉంటాయి. రాష్ట్రంలోని 13 జిల్లాల్లో క్రిస్మస్ సందర్భంగా వీటిని పంపిణీ చేస్తారు.