చిత్తూరు: చంద్రగిరి మండలం చామల అటవీ ప్రాంతంలో సోమవారం ఉదయం పోలీసులు గాలింపు చర్యలు చేపట్టి సుమారు కోటి రూపాయలు విలువచేసే ఎర్రచందనం దుంగలను స్వాధీనం చేసుకున్నారు. పోలీసుల జాడ తెలుసుకొని స్మగ్లర్లు పరారయ్యారు. వారిని పట్టుకొనేందుకు పోలీసులు గాలింపు చర్యలు ముమ్మరం చేశారు.

చిత్తూరు: ఆర్థిక లావాదేవీలు, భూ తగాదాలే చిత్తూరు మేయర్ దంపతుల హత్యకు కారణమని విచారణలో తేలినట్లు జిల్లా ఎస్పీ శ్రీనివాస్ సోమవారం చెప్పారు. ఈ జంట హత్యల కేసులో 23 మందిపై కేసులు నమోదు చేసి ఆరు తుపాకులు, ఐదు కత్తులను స్వాధీనం చేసుకున్నామని, కేసు విచారణ తొంభై శాతం వరకూ పూర్తయిందని చెప్పారు.

చింతపూడి : ఆంధ్రప్రదేశ్‌లో అంగన్వాడీ కార్యకర్తల సమస్యల పరిష్కరిస్తామని రాష్ట్ర స్త్రీ, శిశుసంక్షేమ శాఖ మంత్రి పీతల సుజాత చెప్పారు. పశ్చిమగోదావరి జిల్లా చింతపూడి మార్కెట్‌ యార్డులో నిర్వహించిన అంగన్వాడీ కార్యకర్తల శిక్షణ తరగతుల్లో మంత్రి పాల్గొని ప్రసంగించారు. సమస్యలను సానుభూతితో పరిష్కరిస్తామని హామీ ఇచ్చారు. ఈ సమావేశంలో స్త్రీ,శిశు సంక్షేమ శాఖ ఏపీడీ విజయకుమారి తదితరులు పాల్గొన్నారు.

పామర్రు : కృష్ణాజిల్లా కొమరవోలులో జరిగిన జనచైతన్య యాత్రలో ఏపీ సీఎం చంద్రబాబు సతీమణి భువనేశ్వరి పర్యటించారు. తొలుత గ్రామంలోని ఎన్టీఆర్‌ దపంతుల విగ్రహాలకు పూలమాలవేసి నివాళులర్పించారు. డ్వాక్రా మహిళలకు గ్యాస్‌ సిలిండర్లు పంపిణీ చేశారు. కార్యక్రమంలో పలువురు తెదేపా నాయకులు, అధికారులు పాల్గొన్నారు.