గుంటూరు: బీజేపీ రాష్ట్ర అధ్యక్షుడు కన్నా లక్ష్మీనారాయణ ఇంటి ముందు టీడీపీ శ్రేణులు ధర్నా చేశారు. నిన్న కాకినాడలో ముఖ్యమంత్రి చంద్రబాబు నాయుడు పర్యటనను అడ్డుకున్నందుకు నిరసనగా నేడు టీడీపీ కార్యకర్తలు, నేతలు కన్నా ఇంటి ముందు ఆందోళనకు దిగారు. ఇరుపార్టీల కార్యకర్తల మధ్య ఘర్షణ వాతావరణం నెలకొన్నది. పోలీసులు రావటంతో పరిస్థితి సద్దుమణిగింది.

అమరావతి: హైదరాబాద్ నుంచి ఇక్కడకు వచ్చిన ప్రభుత్వ ఉద్యోగులకు అండగా ఉంటామని ముఖ్యమంత్రి చంద్రబాబునాయుడు హామీ ఇచ్చారు. ఆయన కలెక్టర్లు, నోడల్ అధికారులు, ప్రజాప్రతినిధులతో టెలీ కాన్ఫరెన్స్ నిర్వహించారు. ఇళ్లు లేని ప్రతి ఉద్యోగికి ఇల్లు నిర్మించి ఇస్తామని, అపార్ట్‌మెంట్‌లు నిర్మించి అందులో ఫ్లాట్స్‌లో ఉద్యోగులకు కేటాయించాలని సూచించారు. చుక్కల భూమికి సత్వరమే పరిష్కారం చూపించాలని సూచించారు.

విజయవాడ(సిటీ), జనవరి 4: పేరు ప్రఖ్యాతులు, డబ్బు, హోదా ఉన్నంత మాత్రాన పార్టీలు స్థాపించి వాటిని విజయవంతంగా నడిపించలేమని జనసేన పార్టీ అధినేత పవన్‌కళ్యాణ్ అభిప్రాయపడ్డారు. బాధ్యత, సేవ చేయాలనే తపన, ఓపిక, సహనం, ఇవన్నీ ఉన్నప్పుడే రాజకీయాల్లో రాణించగలమన్నారు. ఒకటి రెండు కులాలను అడ్డుపెట్టుకుని రాజకీయాల్లో విజయం సాధించలేమన్నారు. కులాల ప్రభావం అధికంగా ఉండే రాష్ట్రాల్లో ఇది స్పష్టమయిందన్నారు.

రామచంద్రపురం, జనవరి 4: తూర్పు గోదావరి జిల్లా రామచంద్రపురం పట్టణంలో ఖాయిలాపడి, మూతపడిన ఆర్థోస్ బ్రూవరీస్ సంస్థ రెండు, మూడు నెలల్లో తిరిగి ప్రారంభం కానుంది. ఆర్థోస్ కోస్తాంధ్రలో తొలి బీరు ఫ్యాక్టరీగా గణితికెక్కింది. ప్రముఖ పారిశ్రామికవేత్త స్వర్గీయ అడ్డూరి పద్మనాభరాజు కృషితో రామచంద్రపురం పట్టణంలో బీరు ఫ్యాక్టరీ స్థాపన జరిగింది.