న్యూఢిల్లీ, ఆగస్టు 1: రాయితీ వంటగ్యాస్ ధర సోమవారం స్వల్పంగా పెరిగింది. సిలిండర్‌కు రూపాయి 93 పైసలు చొప్పున పెరగగా, ఈ పెరుగుదలతో ఢిల్లీలో 14.2 కిలోల సిలిండర్ ధర 421.16 రూపాయల నుంచి 423.09 రూపాయలకు చేరింది. జూలై 1న కూడా రూపాయి 98 పైసలు పెరిగినది తెలిసిందే. డీజిల్, పెట్రోల్ మాదిరిగానే వంటగ్యాస్, కిరోసిన్ ధరలపైనా రాయితీని ఎత్తివేసేలా కేంద్ర ప్రభుత్వం చర్యలు ప్రారంభించినది తెలిసిందే.

న్యూఢిల్లీ, ఆగస్టు 1: దేశీయ ఆటోరంగ దిగ్గజం మారుతి సుజుకి సోమవారం కార్ల ధరలను పెంచింది. వివిధ రకాల మోడళ్ల ధరలను 20,000 రూపాయల వరకు పెంచుతున్నట్లు ప్రకటించింది. ఇటీవల మార్కెట్‌కు పరిచయం చేసిన ఎస్‌యువి విటారా బ్రీజా ధర 20,000 రూపాయలు పెరిగితే, బాలెనో ధర 10,000 రూపాయలు పెరిగినట్లు చెప్పింది.

న్యూఢిల్లీ, ఆగస్టు 1: ప్రజలంతా కూడా ఆధార్‌తో తమతమ మొబైల్ నెంబర్లను అనుసంధానం చేసుకోవాలని యూనిక్ ఐడెంటిఫికేషన్ అథారిటీ ఆఫ్ ఇండియా (యుఐడిఎఐ) కోరింది. దీనివల్ల ఆన్‌లైన్‌లో వివిధ ప్రభుత్వ పథకాల ప్రయోజనాలను సులభంగా అందుకోవచ్చని తెలిపింది. కాబట్టి ఆధార్ కార్డు పొందిన సమయంలో మొబైల్ నెంబర్‌ను నమోదు చేసుకోనట్లయితే, తప్పక నమోదు చేసుకోవాలని ఓ ప్రకటనలో సోమవారం యుఐడిఎఐ సిఇఒ అజయ్ భూషణ్ పాండే సూచించారు.

న్యూఢిల్లీ, ఆగస్టు 1: ప్రైవేట్‌రంగ టెలికామ్ సంస్థ వొడాఫోన్ కూడా ఇంటర్నేట్ చార్జీలను తగ్గించింది. ఇప్పటికే భారతీ ఎయిర్‌టెల్, ఐడియా సెల్యులార్ తమ 2జి, 3జి, 4జి సేవల డేటా చార్జీలను తగ్గించినది తెలిసిందే. ఈ క్రమంలో సోమవారం వొడాఫోన్ సైతం తమ 2జి, 3జి, 4జి విభాగాల్లో ఇంటర్నేట్ ధరలను 67 శాతం వరకు దించింది.