హైదరాబాద్: తెలంగాణలో బడుగు, బలహీనవర్గాల విద్యార్థుల కోసం 250 గురుకులాలను ప్రారంభిస్తామని, వీటి భవనాలకు 5వేల కోట్లు ఖర్చవుతుందని విద్యాశాఖ మంత్రి కడియం శ్రీహరి శుక్రవారం విలేఖరులతు తెలిపారు. ఒక్కో గురుకులంలో 600 మంది విద్యార్థులకు ప్రవేశం కల్పిస్తామన్నారు.

ఖమ్మం: సమస్యల పరిష్కారానికి ఇచ్చిపుచ్చుకునే ధోరణి అవసరమని, గిల్లికజ్జాలతో సాధించేది ఏదీలేదని తెలంగాణ సిఎం కెసిఆర్ అన్నారు. ఆయన శుక్రవారం భద్రాచలంలో సీతారామకల్యాణం అనంతరం విలేఖరులతో మాట్లాడుతూ, ఎపి సర్కారుతో తాము సమన్వయంతో ముందుకెళ్లామన్నారు. దుమ్ముగూడెం వద్ద గోదావరి నీటిని వాడుకునే హక్కు ఎపికి ఉందన్నారు.

హైదరాబాద్: సికింద్రాబాద్ వారాసిగూడలో శుక్రవారం ఓ ఇంట్లో విద్యుత్ షాక్‌కు గురై రెండేళ్ల బాలుడితో పాటు తల్లి దుర్మరణం పాలయ్యారు. వాషింగ్ మిషన్ నుంచి బట్టలు తీస్తుండగా వీరు విద్యుత్ షాక్‌కు గురయ్యారు. ప్రమాదం జరిగినపుడు ఇంట్లో మరెవరూ లేకపోవడంతో తల్లి, కుమారుడిని ఎవరూ రక్షించడానికి అవకాశం లేకుండా పోయింది. ఈ సంఘటన స్థానికంగా అందరినీ కలచివేసింది.

హైదరాబాద్: శ్రీరామనవమి పర్వదినం సందర్భంగా హైదరాబాద్ నగరంలో శుక్రవారం మధ్యాహ్నం శోభాయాత్ర ఘనంగా ప్రారంభమైంది. సీతరామ్‌బాగ్‌లో బిజెపి ఎమ్మెల్యే రాజాసింగ్, హిందూ సంస్థల ప్రతినిధుల సమక్షంలో ఈ యాత్ర ప్రారంభమైంది. వివిధ ప్రాంతాల మీదుగా శోభాయాత్ర కోఠిలోని హనుమాన్ వ్యాయామశాల వరకూ కొనసాగుతుంది. ఎక్కడా ఎలాంటి అవాంఛనీయ సంఘటనలు జరగకుండా పోలీసులు భారీ బందోబస్తు ఏర్పాటు చేసి, ట్రాఫిక్‌ను మళ్లించారు.