హైదరాబాద్: తాను తెరాసలో చేరుతున్నానంటూ వస్తున్న వార్తల్లో నిజం లేదని, ఎన్ని కష్టనష్టాలు ఎదురైనా పార్టీ వీడేదిలేదని కాంగ్రెస్ ఎమ్మెల్యే డికె అరుణ స్పష్టం చేశారు. తన సోదరుడు చిట్టెం రామ్మోహన్ రెడ్డి కాంగ్రెస్ ఎమ్మెల్యేగా ఉంటూ తెరాసలో చేరడంపై ఆమె గురువారం స్పందించారు. ఎమ్మెల్యే పదవికి రాజీనామా చేసి రామ్మోహన్ తెరాసలో చేరితే ఎవరికీ అభ్యంతరం ఉండదన్నారు.

మెదక్: వేల కోట్ల రూపాయల రుణాలను తీసుకుని బ్యాంకులను వంచించిన విజయ్ మాల్యాలాంటి వాళ్లకే పాలకులు అండగా నిలుస్తున్నారని, కరవుతో అలమటిస్తున్న రైతుల సంక్షేమం గురించి మాత్రం పట్టించుకోరని సిపిఐ నేత నారాయణ విమర్శించారు. రామాయంపేట, చేగుంట మండలాల్లో దుర్భిక్షం కారణంగా ఎండిపోయిన పంట పొలాలను ఆయన గురువారం పరిశీలించి, ఆత్మహత్య చేసుకున్న రైతు కుటుంబాలను పరామర్శించారు.

వరంగల్: తమ పెళ్లికి పెద్దలు నిరాకరించడంతో ఓ ప్రేమజంట ఆత్మహత్య చేసుకున్న సంఘటన వరంగల్ జిల్లా ఆత్మకూరు మండలంలో కోగిల్వాయి గ్రామంలో జరిగింది. ఈ గ్రామానికి చెందిన గణేష్, రమ రెండేళ్లుగా ప్రేమించుకుంటూ త్వరలోనే పెళ్లి చేసుకోవాలని భావించారు. అయితే, రమకు ఆమె తల్లిదండ్రులు బుధవారం మరో యువకుడితో సంబంధం ఖాయం చేశారు.

మెదక్: సంగారెడ్డి శివార్లలో గురువారం ఉదయం పోలీసులు వాహనాలను తనిఖీ చేస్తుండగా రాజుగౌడ్ అనే ఓ ఘరానా దొంగ చిక్కాడు. అతని వద్ద నుంచి 56 తులాల బంగారు నగలు, రెండు కిలోల వెండి ఆభరణాలు, 5.8 లక్షల నగదు, లాప్‌టాప్‌ను స్వాధీనం చేసుకున్నారు. రాజుగౌడ్ పలు ఇళ్లలో చోరీలు చేసినట్లు పోలీసులు తెలిపారు.