కాకినాడ, డిసెంబర్ 30: ఓవైపు తూర్పు గోదావరి జిల్లా కేంద్రం కాకినాడలో ఆందోళనకారులపై ఉక్కుపాదం మోపిన పోలీసు యంత్రాంగం, మరోవైపు కాకినాడ తీరంలో పోర్టు నిర్మాణానికి సంబంధించి ప్రజాభిప్రాయ సేకరణ నిర్వహించింది. ఎక్కడిక్కడే నిరసనకారులను అరెస్టు చేసి, పోలీస్ స్టేషన్లకు తరలించిన అధికారులు, ఇదే సమయంలో తీరంలో పోర్టు నిర్మాణంపై ప్రజల నుండి అభిప్రాయలను సేకరించారు.

పోలవరం, డిసెంబర్ 30: ముఖ్యమంత్రి నారా చంద్రబాబునాయుడు పాల్గొన్న పోలవరం కాంక్రీటు పనుల ప్రారంభోత్సవ సంరంభంలో అపశృతి చోటుచేసుకుంది. ముఖ్యమంత్రి సభకు జనంతో తరలివస్తున్న ఒక స్కూలు బస్సు బ్రేకులు ఫెయిలవ్వడంతో ఘోర ప్రమాదం తప్పింది. ఒక బైక్‌ను ఢీకొని, రాళ్లను ఢీకొని నిలిచిపోవడంతో లోయలో పడిపోయే ప్రమాదం తప్పింది. ఈ ప్రమాదంలో ఒక మండల వ్యవసాయాధికారి మృతిచెందగా, మరో తొమ్మిది మందికి గాయాలయ్యాయి.

తిరుపతి, డిసెంబర్ 30: ఏపిపిఎస్‌సి ద్వారా 4వేల మందికి ఉద్యోగాలు కల్పించేందుకు అన్ని విభాగాల్లో పారదర్శకంగా పరీక్షలు నిర్వహించి అర్హులైనవారికి ఉద్యోగాలు కల్పించేందుకు ప్రభుత్వానికి సిఫార్సు చేస్తామని ఏపిపిఎస్‌సి చైర్మన్ పిన్నమనేని భాస్కర్ వెల్లడించారు. శ్రీవారి దర్శనార్థం కుటుంబ సమేతంగా ఆయన గురువారం తిరుమలకు చేరుకున్నారు.

సబ్బవరం, డిసెంబర్ 30: విశాఖ జిల్లా అనకాపల్లి- అనందపురం రోడ్డు విస్తరణలో భూములు కోల్పోయిన రైతులకు మార్కెట్ ధరపై నాలుగు రెట్ల నష్టపరిహారం అందిస్తామని 16వ నెంబర్ జాతీయ రహదారుల సంస్థ భూసేకరణ డిప్యూటీ కలెక్టర్ ఎ.సుబ్బరాజు పేర్కొన్నారు. శుక్రవారం పెదనాయుడుపాలెం రైతులతో జరిపిన చర్చల్లో ఆయన మాట్లాడుతూ రైతులు ఈవిషయంలో ఎలాంటి ఆందోళన చెందవద్దన్నారు.