కర్నూలు, డిసెంబర్ 2: నగదు రహిత లావాదేవీల నిర్వహణలో భాగంగా ఆంధ్రప్రదేశ్ ప్రభుత్వం కొత్తగా ఒక యాప్‌ను రూపొందించనున్నట్లు సమాచారం. ఎపి పర్స్ పేర సిద్ధమవుతున్న ఈ యాప్ అన్ని స్మార్ట్ఫోన్లలో పనిచేసేలా తయారుచేస్తున్నట్లు తెలుస్తోంది. సాఫ్ట్‌వేర్ రంగంలో అనుభవం ఉన్న యువత ఈ యాప్‌కు సంబంధించిన ప్రాథమిక వివరాలు ముఖ్యమంత్రి చంద్రబాబుకు వివరించడంతో ఆయన సంతృప్తి చెంది యాప్ తయారుచేయాలని కోరినట్లు సమాచారం.

న్యూఢిల్లీ, డిసెంబర్ 2: గోదావరి జిల్లాల్లో ఒఎన్‌జిసి, గెయిల్ గ్యాస్ పైప్‌లైన్ల్‌ను నూతన సాంకేతిక పరిజ్ఞానంతో ప్రవేశపెట్టాలని కేంద్రానికి టిడిపి ఎంపీ తోట నరసింహం విజ్ఞప్తి చేశారు. లోక్‌సభ జీరోఅవర్‌లో ఈ అంశాన్ని లేవనేత్తారు. గెయిల్, ఒఎన్‌జిసి పైప్‌లైన్లు అనేక సార్లు పగిలిపోయి ఆస్తి, ప్రాణ నష్టం వాటిల్లిందని ఆయన చెప్పారు.

హైదరాబాద్, డిసెంబర్ 2: తూర్పు గోదావరి జిల్లా కాంగ్రెస్ కమిటీ అధ్యక్షుడిగా పంతం వెంకటేశ్వరావు (నానాజి)ను ఎపిపిసిసి అధ్యక్షుడు ఎన్.రఘువీరారెడ్డి నియమించారు. జిల్లాలో పార్టీని బలోపేతం చేయడంతో పాటు ప్రజా సమస్యలపై ఎప్పటికప్పుడు పోరాటాలు చేయాలని రఘువీరా ఆయనకు సూచించారు.

హైదరాబాద్, డిసెంబర్ 2: ప్రధాని నరేంద్ర మోదీ కన్ను మహిళల మంగళ సూత్రాలపై పడిందని ఎపి కాంగ్రెస్ కమిటీ అధ్యక్షుడు ఎన్. రఘువీరా రెడ్డి విమర్శించారు. మహిళల జోలికి వెళితే ఎన్డీయే భస్మం అవుతుందని ఆయన శుక్రవారం ఇక్కడ విలేఖరుల సమావేశంలో మాట్లాడుతూ హెచ్చరించారు.