విశాఖపట్నం, మే 16: ఎంబిఎ, ఎంసిఎ కోర్సుల్లో ప్రవేశాలకు సంబంధించిన ఎపిఐసెట్-2016 రాష్ట్రంలో సోమవారం ప్రశాంతంగా జరిగింది. ఈ పరీక్షకు 89.48 శాతం మంది అభ్యర్థులు హాజరయ్యారు. ఉదయం ఆరు గంటలకు ఈ పరీక్షకు సంబంధించిన సెట్ కోడ్‌ను రాష్ట్ర మంత్రి గంటా శ్రీనివాసరావు విడుదల చేశారు. 17 ప్రాంతీయ కేంద్రాల్లో 138 కేంద్రాల్లో ఈ పరీక్షను నిర్వహించారు.

కర్నూలు: కొత్తగా చేపడుతున్న సాగునీటి ప్రాజెక్టులకు అనుమతులున్నాయా? అంటూ వైకాపా అధినేత జగన్ తెలంగాణ సిఎం కెసిఆర్‌ను ప్రశ్నించారు. కృష్ణా, గోదావరి జలాలపై వాటా తేలకముందే ప్రాజెక్టులు కట్టడం తగదని ఆయన సోమవారం కర్నూలులో జలదీక్ష సందర్భంగా అన్నారు. తెలంగాణ ప్రాజెక్టులతో రాయలసీమకు తీరని అన్యాయం జరుగుతున్నా ఎపి సిఎం చంద్రబాబు ఎందుకు నిలదీయడం లేదన్నారు.

విజయవాడ: ఇటీవల జరిగిన జాతీయస్థాయి పాఠశాలల చదరంగం టోర్నీలో విజేతగా నిలిచిన పొట్లూరి సుప్రీతకు ఎపి సిఎం చంద్రబాబు సోమవారం ఇక్కడ అయిదు లక్షల రూపాయల నజరానా అందజేశారు. జాతీయ స్థాయిలో ప్రతిభ చాటినందుకు ఆమెను అభినందించారు. త్వరలో జరిగే ఆసియా స్థాయి, ప్రపంచ స్థాయి పోటీల్లో ఆమె ఎపికి, దేశానికి వనె్న తేవాలని ఆయన ఆకాంక్షించారు.

కర్నూలు: ఇంట్లో ఒంటరిగా ఉన్న ఓ వివాహితపై కొందరు ఆగంతకులు సోమవారం ఉదయం యాసిడ్ దాడి చేశాడు. ఆళ్లగడ్డ మండలం కోటకందుకూరులో ఈ దారుణం జరిగింది. బాధితురాలిని వెంటనే ఆస్పత్రికి తరలించారు. యాసిడ్ దాడికి పాల్పడ్డ ఆగంతకుల్లో రాజు అనే యువకుడు ఉన్నట్లు సమాచారం. యాసిడ్ దాడికి కారణాలపై పోలీసులు ఆరా తీస్తున్నారు.