విజయవాడ: జిల్లా కాంగ్రెస్ కార్యదర్శి డి.నాగేశ్వరరావును అతని స్వగ్రామంలో దుండగులు హత్య చేశారు. తిరువూరు మండలం అక్కపాలెంలో బుధవారం తెల్లవారు జామున రక్షిత నీటి పథకం ఓవర్‌హెడ్ ట్యాంకు నుంచి నీటిని విడుదల చేసేందుకు వెళ్లిన ఆయనను పథకం ప్రకారం హత్య చేశారు. నీటిగుంటలో ఆయన మృతదేహాన్ని స్థానికులు గమనించి పోలీసులకు ఫిర్యాదు చేశారు. మృతుడు నాగేశ్వరరావు భార్య వెంకటరమణ అక్కపాలెం సర్పంచ్‌గా ఉన్నారు.

విజయవాడ: రోడ్డు ప్రమాదంలో భార్య సాహిత్యవాణిని కోల్పోయిన ఆప్కాబ్ చైర్మన్ పిన్నమనేని వెంకటేశ్వరరావును బుధవారం ఉదయం రుద్రపాకలో ఎపి సిఎం చంద్రబాబు పరామర్శించారు. సాహిత్యవాణి మృతదేహం వద్ద ఆయన నివాళులర్పించారు. రాష్ట్ర మంత్రులు యనమల, దేవినేని, పుల్లారావు, రవీంద్ర, కామినేని శ్రీనివాస్ తదితరులు పిన్నమనేనిని పరామర్శించారు. సాహిత్యవాణి మరణంతో రుద్రపాకలో విషాదఛాయలు అలముకున్నాయి.

హైదరాబాద్, మే 17: కడప జిల్లా బ్రహ్మంగారి మఠం కెజిబివికి చెందిన బధిర విద్యార్థిని నాగలక్ష్మి పదో తరగతిలో జిపిఎ 10కి 10 సాధించిన నేపథ్యంలో ఆమె ఉన్నత చదువులకు రాష్ట్రప్రభుత్వం పూర్తి సహకారం అందిస్తుందని మానవ వనరుల మంత్రి గంటా శ్రీనివాసరావు చెప్పారు. మంగళవారం ఆయన నాగలక్ష్మిని ఘనంగా సత్కరించారు.

కాకినాడ, మే 17: తన కుమార్తె అశ్లీల చిత్రాలను సామాజిక మాధ్యమాల ద్వారా ప్రచారం చేస్తామని బెదిరిస్తున్న నిందితులపై తూర్పు గోదావరి జిల్లా కాకినాడకు చెందిన ఓ న్యాయవాది జాతీయ మానవ హక్కుల సంఘాన్ని ఆశ్రయించారు. ఒక ప్రజాప్రతినిధి అనుచరులకు, తనకు మధ్య గల భూవివాదాల కారణంగా తనపై ఈ విధంగా కక్ష గట్టినట్టు ఆయన పేర్కొన్నారు.