విజయవాడ, ఆగస్టు 30: రాజధాని అమరావతిలో నిర్మిస్తున్న రహదార్ల నిర్మాణంలో అధికారులు, గుత్తేదారులు ప్రణాళికాబద్ధంగా పని చేయాలని ఏడీసీ సీఎండీ డీ లక్ష్మీపార్థసారథి సూచించారు. రాజధానిలోని ప్యాకేజీ 5, 6, 7లో జరుగుతున్న రహదార్ల నిర్మాణాలను గురువారం ఆమె పరిశీలించారు. వర్షాలు కురుస్తున్నాయని పనుల్లో జాప్యం చేయరాదని హెచ్చరించారు.

కర్నూలు, ఆగస్టు 30 : శ్రీశైలం ప్రాజెక్టు గేట్లను గురువారం జలాశయం అధికారులు మూసివేశారు. 3 రోజుల క్రితం 4 గేట్లను తెరిచి దిగువ సాగర్‌కు నీటిని విడుదల చేసిన అధికారులు గురువారం అన్ని గేట్లను మూసివేసి కేవలం విద్యుత్ ఉత్పత్తి ద్వారా దిగువ సాగర్‌కు నీటిని విడుదల చేస్తున్నారు. శ్రీశైలం జలాశయానికి కృష్ణానది నుంచి మాత్రమే 1,24,969 క్యూసెక్కుల నీరు వచ్చి చేరుతోంది.

నరసరావుపేట, ఆగస్టు 29: సినీ నటుడు, మాజీ ఎంపీ, తెలుగుదేశం పొలిట్‌బ్యూరో సభ్యుడు నందమూరి హరికృష్ణ రోడ్డు ప్రమాదంలో మృతిచెందడం పట్ల శాసనసభ స్పీకర్ కోడెల శివప్రసాదరావు బుధవారం తీవ్ర దిగ్భ్రాంతిని వ్యక్తం చేశారు. హరికృష్ణ ప్రముఖ శైవక్షేత్రమైన గుంటూరు జిల్లా నరసరావుపేట సమీపంలోని కోటప్పకొండకు వచ్చి స్వామివారిని దర్శించుకున్న సంఘటనలు గుర్తు చేసుకున్నారు.

విజయవాడ (కార్పొరేషన్), ఆగస్టు 28: విద్యుత్ కాంట్రాక్ట్ సిబ్బందికి వేతనాలు పెంచాలని, సర్వీస్ రెగ్యులరైజ్ చేయాలన్న డిమాండ్‌తో బుధవారం చేపట్టిన విద్యుత్ సౌధ ముట్టడి ఉద్రిక్తంగా మారింది. నగరంలోని గుణదలలోని విద్యుత్ సౌధ ముట్టడికి బుధవారం తరలివచ్చిన వేలాది మంది కాంట్రాక్ట్ కార్మికులను పోలీసులు అడ్డుకోవడంతో తీవ్ర ఉద్రిక్త వాతావరణం నెలకొంది. వాగ్వాదాలు, తోపులాటలు, ఘర్షణలతో అట్టుడికింది.