రాజమహేంద్రవరం, ఆగస్టు 24: గోదావరి వరద ఉద్ధృతి తగ్గుముఖం పట్టింది. ధవళేశ్వరం బ్యారేజి వద్ద నీటి మట్టం తగ్గుతోంది. తూర్పు గోదావరి జిల్లా ధవళేశ్వరం కాటన్ బ్యారేజీ వద్ద శుక్రవారం మధ్యాహ్నం 12.30 గంటలకు మొదటి ప్రమాద హెచ్చరిక ఉపసంహరించారు. ఈ దశలో బ్యారేజి వద్ద 11.40 అడుగుల నీటి మట్టం నమోదైంది. సముద్రంలోకి 9.55 లక్షల క్యూసెక్కుల నీరు చేరుతోంది.

ఒంగోలు, ఆగస్టు 24: రొయ్యరైతులను రానున్న సీజన్‌లో నట్టేట ముంచేందుకు వ్యాపారులు సిండికేట్‌గా మారి భారీగా రొయ్యల ధరలను పెంచారన్న ఆరోపణలు వెల్లువెత్తుతున్నాయి. ఇటీవల కాలంలో 30కౌంట్ వెనామీ రొయ్య 330రూపాయలనుండి 350రూపాయల వరకు ధర పలకగా ప్రస్తుతం అదే కౌంట్ వెనామీ రొయ్యను కేజి 450రూపాయలకు వ్యాపారులు పెంచివేశారు.

కాకినాడ, ఆగస్టు 24: కేరళ వరద బాధితులను ఆదుకోవడానికి తూర్పు గోదావరి జిల్లా కాకినాడలోని బియ్యం ఎగుమతిదార్ల సంఘం ముందుకొచ్చింది. సుమారు రూ.55 లక్షల విలువ గల బియ్యం, దుప్పట్లు, దుస్తులు కేరళ వరద బాధితులకు పంపించారు. శుక్రవారం కాకినాడలోని సంఘం కార్యాలయం వద్ద జరిగిన కార్యక్రమంలో తూర్పు గోదావరి జిల్లా కలెక్టర్ కార్తికేయ మిశ్రా, ఆధ్యాత్మిక ప్రవచనకారుడు చాగంటి కోటేశ్వరరావు లారీలకు జెండా ఊపి సాగనంపారు.

విజయవాడ, ఆగస్టు 24: బీజేపీతో వైసీపీ నేత జగన్‌కు ఉన్న సంబంధం పవిత్రమా... అపవిత్రమా తెలిపిన తర్వాత కేరాఫ్ అడ్రస్ లేని జీవీఎల్ నరసింహారావులాంటి వారు మాట్లాడాలని సాంఘిక, గిరిజన సంక్షేమ శాఖల మంత్రి నక్కా ఆనంద్‌బాబు హితవు పలికారు.