న్యూఢిల్లీ, మార్చి 3: బులియన్ మార్కెట్‌లో బంగారం, వెండి ధరలు పడిపోయాయి. శుక్రవారం ట్రేడింగ్‌లో 10 గ్రాముల పసిడి ధర 275 రూపాయలు తగ్గగా, ఈ ఒక్కరోజే కిలో వెండి విలువ ఏకంగా 1,350 రూపాయలు దిగింది. ఫలితంగా 99.9 స్వచ్ఛత కలిగిన పుత్తడి 30 వేల దిగువకు చేరి 29,725 రూపాయల వద్ద స్థిరపడితే, 99.5 స్వచ్ఛత కలిగిన దాని ధర 29,575 రూపాయలుగా ఉంది.

ముంబయి, మార్చి 3: అంతర్జాతీయ బాండ్ల విక్రయం ద్వారా నిధులను సమీకరించినట్లు దేశీయ ప్రైవేట్‌రంగ బ్యాంకింగ్ దిగ్గజం ఐసిఐసిఐ బ్యాంక్ శుక్రవారం తెలియజేసింది. ఈ బాండ్ల జారీతో 300 మిలియన్ డాలర్లను అందుకున్నట్లు చెప్పింది. 5.5 సంవత్సరాల నిర్ణీత రేటు నోట్లను దుబాయ్ ఇంటర్నేషనల్ ఫైనాన్స్ సెంటర్ (డిఐఎఫ్‌సి)లోని తమ శాఖ ద్వారా అమ్మినట్లు ఓ ప్రకటనలో పేర్కొంది.

న్యూఢిల్లీ, మార్చి 3: ముకేశ్ అంబానీ నేతృత్వంలోని సంచలన 4జి టెలికామ్ సంస్థ రిలయన్స్ జియో.. తమ ప్రస్తుత (ప్రైమ్) కస్టమర్లకు మరింత డేటాను అందించాలని నిర్ణయించింది. ఇందులో భాగంగానే 303 రూపాయలతో రీచార్జ్ చేసుకునేవారికి అదనంగా 5 జిబి డేటా లభించనుంది.

విశాఖపట్నం, మార్చి 3: విశాఖ స్టీల్ ప్లాంట్‌కు ప్రస్తుత 2016-17 ఆర్థిక సంవత్సరానికి సంబంధించి విజిలెన్స్ ఎక్స్‌లెన్స్ అవార్డు దక్కింది. స్టీల్ ప్లాంట్‌కు వరుసగా నాలుగో సంవత్సరం ఈ అవార్డు లభించడం గమనార్హం. హైదరాబాద్‌లో శుక్రవారం జరిగిన ఒక కార్యక్రమంలో విజిలెన్స్ అధికారులు ఈ అవార్డును స్టీల్ ప్లాంట్ అధికారులకు అందజేశారు.