తిరుపతి: ఎ.పి. రాజధాని అమరావతి నిర్మాణానికి తమ వంతు బాధ్యతగా రాష్ట్రంలోని సర్పంచ్‌లు, ఎంపిటిసి సభ్యులు నెల రోజుల గౌరవ వేతనాన్ని విరాళంగా ఇవ్వనున్నట్లు ఎమ్మెల్సీ బాబూ రాజేంద్రప్రసాద్ తెలిపారు. ఆయన గురువారం ఇక్కడ విలేకరులతో మాట్లాడుతూ, నెల గౌరవ వేతనం కింద 9 కోట్ల రూపాయలను ప్రభుత్వానికి అందజేస్తామన్నారు.

హైదరాబాద్: జిహెచ్‌ఎంసి ఎన్నికల్లో నామినేషన్ల ఉపసంహరణకు ఈ రోజు మధ్యాహ్నం మూడు గంటలతో గడువు ముగుస్తుంది. పలు వార్డుల్లో వివిధ పార్టీల తరఫున ఒకరి కంటే ఎక్కువ మంది నామినేషన్లు వేశారు. రెబల్స్‌గా బరిలో దిగిన వారిని బుజ్జగించేందుకు టిఆర్‌ఎస్, కాంగ్రెస్, బిజెపి నేతలు ప్రయత్నిస్తున్నారు. ఉపసంహరణ గడువులోగా అభ్యర్థులు సంబంధిత పార్టీల నుంచి బి-్ఫరాలను సమర్పించాల్సి ఉంది

హైదరాబాద్: దళిత విద్యార్థి రోహిత్ ఆత్మహత్య అనంతరం ఐదో రోజు గురువారం కూడా హెచ్‌సియులో బంద్ కొనసాగుతోంది. విద్యార్థుల ఆందోళనకు మద్దతు తెలిపేందుకు దిల్లీ సి.ఎం. కేజ్రీవాల్, సిపిఐ నేతలు సురవరం సుధాకర్‌రెడ్డి, మాజీ ఎం.పి. అజీజ్ పాషా తదితరులు ఈ రోజు వర్శిటీకి వస్తున్నారు. రాజకీయ నేతల తాకిడి అధికం కావడంతో పోలీసులు విస్తృత బందోబస్తు ఏర్పాటు చేశారు.

దిల్లీ: అంతర్జాతీయ తీవ్రవాద సంస్థ ‘ఐసిస్’తో సంబంధాలు ఉన్న నలుగురు అనుమానిత వ్యక్తులను ఉత్తరాఖండ్‌లో పోలీసులు గురువారం అరెస్టు చేశారు. గణతంత్ర వేడుకల సమయంలో దేశంలో ఉగ్రవాదుల దాడులకు అవకాశం ఉందని నిఘా వర్గాలు హెచ్చరించటంతో పోలీసులు దిల్లీ సహా పొరుగు రాష్ట్రాల్లో విస్తృతంగా తనిఖీలు చేస్తున్నారు. ఈ నేపథ్యంలో ఉత్తరాఖండ్‌లో నలుగురిని అరెస్టు చేసి క్షుణ్ణంగా ప్రశ్నిస్తున్నారు.