హైదరాబాద్, జనవరి 20: ప్రముఖ విదేశీ ఆటోరంగ సంస్థ ఫోర్డ్.. హైదరాబాద్‌లో బుధవారం తమ కొత్త కారును ఆవిష్కరించింది. సరికొత్త ఎండీవర్ ఎస్‌యువి కారును పరిచయం చేసింది. రెండు రకాల శక్తివంతమైన, ఇంధన పొదుపు సామర్థ్యం కలిగిన ఇంజిన్లతో ఎండీవర్‌ను డిజైన్ చేసినట్లు ఈ సందర్భంగా ఫోర్డ్ తెలియజేసింది. 2.2 లీటర్, 3.2 లీటర్ ఇంజిన్లతో ఇవి అందుబాటులో ఉంటాయని వివరించింది.

హైదరాబాద్, జనవరి 20: సింగరేణి ఆణిముత్యాలు కార్యక్రమంలో భాగంగా ఈనెల 27 నుంచి ఫిబ్రవరి 1 వరకు సింగరేణిలోని అన్ని ప్రాంతాల్లో ఉద్యోగ మేళా నిర్వహిస్తున్నట్లు సంస్థ సిఎండి ఎన్ శ్రీధర్ తెలిపారు. ఒక్కో ప్రాంతంలో రెండు రోజులపాటు మేళా జరుగుతుందని, నిరుద్యోగ యువత ఈ అవకాశాన్ని వినియోగించుకోవాలని కోరారు.

న్యూఢిల్లీ, జనవరి 20: బిజెపి తాత్కాలిక అధ్యక్షుడు అమిత్ షా ఈ నెలాఖరుకు పూర్తిస్థాయి అధ్యక్షుడుగా ఎన్నిక కానున్నారు. బిజెపి అధ్యక్ష పదవి చేపట్టేందుకు హోంమంత్రి రాజ్‌నాథ్ సింగ్, ఉపరితల రవాణా శాఖ మంత్రి నితిన్ గడ్కరీ నిరాకరించటంతో అమిత్ షా పార్టీ అధ్యక్షుడుగా ఎన్నిక కావటం దాదాపుగా ఖాయమైపోయింది.

న్యూఢిల్లీ, జనవరి 20: ఉత్తరాఖండ్‌లో నలుగురు అనుమానిత ఉగ్రవాదుల అరెస్టుతో హరిద్వార్‌లో జరిగే అర్ధ్ కుంభమేళా సందర్భంగా దాడులకు పాల్పడాలన్న ఉగ్రవాదుల కుట్ర బయటపడిందని ఢిల్లీ పోలీసులు బుధవారం చెప్పారు. అర్ధ్ కుంభమేళా సందర్భంగా హరిద్వార్ వైపు వెళ్తున్న రైళ్లపై, దేశ రాజధాని ఢిల్లీలోని కొన్ని వ్యూహాత్మక ప్రదేశాలపై దాడులకు పాల్పడాలని ఉగ్రవాదులు కుట్ర పన్నారని పోలీసులు తెలిపారు.