బెంగళూరు: కర్నాటకలో ఎక్కువ స్థానాలు గెలిచిన పార్టీ మాదని బీజేపీ అధ్యక్షుడు అమిత్‌షా అన్నారు. కాంగ్రెస్, జేఏసీ పార్టీలను ప్రజలను తిరస్కరించారని అన్నారు. ప్రభుత్వం ఏర్పాటుచేసే హక్కు బీజేపీకి మాత్రమే ఉన్నదని అన్నారు. ప్రజలు ఎవ్వరికీ సరైన మెజార్టీ ఇవ్వలేదని, మళ్లీ ఎన్నికలు నిర్వహించాలని ఆయన డిమాండ్ చేశారు.

న్యూఢిల్లీ: రాజీవ్‌గాంధీ 27వ వర్థంతి సందర్భంగా కాంగ్రెస్ చీఫ్ రాహుల్ తన సోదరి ప్రియాంకా గాంధీతో కలిసి ఢిల్లీలోని వీర్ భూమి వద్ద రాజీవ్ గాంధీకి నివాళులు అర్పించారు. కాంగ్రెస్ మాజీ చీఫ్ సోనియా గాంధీ, మాజీ ప్రధాని మన్మోహన్ సింగ్, కాంగ్రెస్ సీనియర్ నేతలు సుశీల్ కుమార్ షిండే, మల్లికార్జున్ ఖర్గే తదితరులు కూడా రాజీవ్ గాంధీకి నివాళులు అర్పించారు.

రాంచీ: ఉరుములు, మెరుపులతో జార్ఖండ్‌లో కురిసిన భారీ వర్షాల వల్ల ముగ్గురు వ్యక్తులు మృతి చెందారు. మరో నలుగురు గాయ పడ్డారు. కేవలం రాంచీలో గంటసేపు కురిసిన వర్షంతో 54.4 మిమీ వర్షపాతం నమోదైంది. భారీ వర్షాలకు తోడు గంటకు 60 కి.మీ వేగంతో ఈదురు గాలులు వీయడంతో రాంచీలోని పలు ప్రాంతాల్లో చెట్లు విరిగి పడ్డాయి. దీంతో ట్రాఫిక్‌కు అంతరాయం ఏర్పడింది. లోతట్టు ప్రాంతాలు జలమయం అయ్యాయి.

కర్ణాటక: హసన్‌లోని లక్ష్మీనరసింహస్వామి ఆలయంలో కుమారస్వామి పూజలు చేశారు. కుమారస్వామి ఢిల్లీ బయలుదేరి వెళ్లనున్నారు. మధ్యాహ్నం 3:30 గంటలకు ఏఐసీసీ అధ్యక్షుడు రాహుల్‌గాంధీతో సమావేశం కానున్నారు. సాయంత్రం 4:40 గంటలకు సోనియాగాంధీతో భేటీ కానున్నారు. ఈ నెల 23న తన ముఖ్యమంత్రి ప్రమాణస్వీకారానికి వారిని కుమారస్వామి ఆహ్వానించనున్నారు. సాయంత్రం 6 గంటలకు బెంగళూరు తిరుగుప్రయాణం కానున్నారు.