దిల్లీ: రాష్ట్ర విభజన సమయంలో అలనాడు కాంగ్రెస్ నేతలు అనాలోచితంగా వ్యవహరించినందునే నేడు ఎపి ప్రజలు నానాకష్టాలు పడుతున్నారని టిడిపి ఎంపి సిఎం రమేష్ శుక్రవారం రాజ్యసభలో ఆవేదన వ్యక్తం చేశారు. ఎపికి ప్రత్యేక హోదా కోసం ఓ ప్రైవేటు మెంబర్ బిల్లుపై ఆయన మాట్లాడుతూ, విభజన చట్టంలో ఎన్నో లోపాలున్నందున వాటిని సవరించాలన్నారు. తగినన్ని నిధులిచ్చి ఎపిని ఆదుకోవాల్సిన బాధ్యత కేంద్రంపై ఉందన్నారు.

దిల్లీ: మెడికల్ కోర్సుల్లో ప్రవేశాలకు దేశవ్యాప్తంగా ‘నీట్’ (జాతీయ స్థాయి ప్రవేశ పరీక్ష)ను షెడ్యూల్ ప్రకారమే నిర్వహించాలని సుప్రీం కోర్టు స్పష్టం చేసింది. ‘నీట్’పై గురువారం ఇచ్చిన తీర్పుపై కేంద్ర ప్రభుత్వం దాఖలు చేసిన రివ్యూ పిటిషన్‌ను సుప్రీం కోర్టు ఈరోజు తిరస్కరించింది. ముందు ప్రకటించినట్లు రెండు విడతలుగా పరీక్ష జరపాలని ఆదేశించింది.

దిల్లీ: ఛాతి నొప్పితో బాధపడుతూ ఇక్కడి ఎయిమ్స్ ఆస్పత్రిలో చికిత్స పొందుతున్న విదేశాంగ మంత్రి సుష్మా స్వరాజ్‌ను కాంగ్రెస్ ఉపాధ్యక్షుడు రాహుల్ గాంధీ శుక్రవారం పరామర్శించారు. ఆమె ఆరోగ్య పరిస్థితి గురించి ఆయన వైద్యులను వివరాలు అడిగి తెలుసుకున్నారు. ఆమె త్వరితంగా కోలుకుంటున్నందున త్వరలోనే డిశ్చార్జి చేస్తామని ఎయిమ్స్ వైద్యులు తెలిపారు.

న్యూఢిల్లీ: నేతాజీ సుభాష్ చంద్రబోస్‌ మరణ మిస్టరీకి సంబంధించిన మరో 25 రహస్య పత్రాలను www.netajipapers.gov.in అనే వెబ్ సైట్‌లో అందుబాటులో ఉంచినట్లు కేంద్ర సాంస్కృతిక వ్యవహారాల మంత్రి మహేష్ శర్మ శుక్రవారం తెలిపారు. నేతాజీ 119వ జయంతి సందర్భంగా ఈ ఏడాది జనవరి 23న వంద రహస్య పత్రాలను బయటపెట్టారు.