హైదరాబాద్, జూలై 25: రాష్ట్రంలో ఇంజనీరింగ్ కాలేజీలు నిర్వహించలేమంటూ యాజమాన్యాలు చేతులెత్తేస్తున్నాయి. ఇంత కాలం అడ్మిషన్లను చూపించి కాలం గడిపిన కాలేజీల యాజమాన్యాలు ఈసారి అది కూడా దక్కక పోవడంతో లబోదిబోమంటున్నాయి. ఈ ఏడాది ఐదు కాలేజీల్లో కనీసం ఒక్కరు కూడా చేరలేదు. దాంతో కాలేజీ నిర్వహణ తమ వల్ల కాదని, ఉన్న విద్యార్థులను వేరే కాలేజీల్లో సర్దుబాటు చేయాలని వారు కోరుతున్నారు.

విజయవాడ: ఇంద్రకీలాద్రిపై శాకంబరీ ఉత్సవాలు జరుగుతున్నాయి. కనకదుర్గ అమ్మవారిని, ఆలయాన్ని కూరగాయలతో అలంకరించారు. ఈ ఉత్సవాల సందర్భంగా 40 టన్నుల వరకు కూరగాయలు రావచ్చని ఆలయ అధికారులు అంచనా వేస్తున్నారు. వివిధ రకాల కూరగాయలతో అలంకరించిన అమ్మవారిని దర్శించుకునేందుకు భక్తులు పెద్ద సంఖ్యలో తరలి వస్తున్నారు.

కర్నూలు: శ్రీశైలం జలాశయానికి భారీగా వరద నీరు వచ్చి చేరుతుంది. జలాశయం పూర్తిస్థాయి నీటిమట్టం 885 అడుగులు కాగా ప్రస్తుత నీటిమట్టం 860 అడుగులుగా కొనసాగుతుంది. ప్రాజెక్టుకు ఇన్‌ఫ్లో 2,30,392 క్యూసెక్కుల నీరు వచ్చి చేరుతుంది.

రాజమహేంద్రవరం, జూలై 24: గోదావరి నదిలో వరద ప్రవాహ ఉద్ధృతి క్రమేపీ తగ్గుముఖం పడుతోంది. మంగళవారం ఉదయం ధవళేశ్వరం సర్ ఆర్ధర్ కాటన్ బ్యారేజి నుంచి 3 లక్షల 52 వేల క్యూసెక్కుల వరద జలాలను సముద్రంలోకి విడిచిపెడితే, సాయంత్రానికి 3 లక్షల 20 వేల 46 క్యూసెక్కులకు తగ్గింది. వరద ఉద్ధృతి తగ్గుతుండటంతో బ్యారేజి గేట్లను క్రమేణా కిందికి దించుతున్నారు.