అమరావతి, జూన్ 23: ఎన్నికలు ఏ క్షణాన వచ్చినా ఎదుర్కొనేందుకు సిద్ధంగా ఉండాలని టీడీపీ అధినేత,ముఖ్యమంత్రి చంద్రబాబు నాయుడు పార్టీ నేతలకు పిలుపునిచ్చారు. కర్నూలు జిల్లా టీడీపీ నేతలను ముఖ్యమంత్రి చంద్రబాబునాయుడు హెచ్చరించారు. ‘గ్రూపులు మానుకోండి. సమన్వయంతో పనిచేయండి. మనం తిరిగి అధికారంలోకి వస్తేనే అభివృద్ధి కొనసాగుతుందనే సంకేతాలను ప్రజలకు వివరించండి’అని ఆయన అన్నారు.

విజయనగరం, జూన్ 23: ‘మేం చెప్పేవి వాస్తవాలు. చంద్రబాబు చెప్పేవి అవాస్తవాలు.మేం మిత్ర ధర్మంతో మాట్లాడుతున్నాం. కేంద్రం మంజూరు చేసే ప్రతి పథకంలోనూ రాష్ట్ర ప్రభుత్వం పెద్ద ఎత్తున అవినీతికి పాల్పడుతోంది’అని బీజేపీ రాష్ట్ర అధ్యక్షుడు కన్నా లక్ష్మీనారాయణ ఆరోపించారు. ముఖ్యమంత్రి చంద్రబాబు అవినీతిని నిరూపించలేకపోతే జైలుకెళ్తానని శనివారం ఇక్కడ సంచలన ప్రకటన చేశారు.

విజయవాడ, జూన్ 23: కృష్ణా నదిలో పవిత్ర సంగమం వద్ద శనివారం నలుగురు బీటెక్ విద్యార్థులు గల్లంతయ్యారు. కృష్ణా డెల్టాకు సాగునీటి కోసం ఇబ్రహీంపట్నం పవిత్ర సంగమానికి గత రెండు రోజులుగా గోదావరి జలాలు వస్తున్నాయి. ఈ దృశ్యాలను చూడడానికి వచ్చిన నలుగురు బీటెక్ విద్యార్థులు గల్లంతయ్యారు. సాయంత్రానికి వీరిలో ఒకరి మృతదేహాన్ని గుర్తించారు.

రాజమహేంద్రవరం, జూన్ 23: బహుళార్ధ సాధక పోలవరం ప్రాజెక్టుపై కోటి ఆశలు గూడు కట్టుకున్నాయి. పోలవరం ప్రాజెక్టు హెడ్ వర్క్సు మాదిరిగా ఎడమ కాలువ పనులు మాత్రం పరుగులు పెట్టడం లేదు. ఎడమ ప్రధాన కాలువ ఎప్పటికి పూర్తవుతుందో తెలియని పరిస్థితి నెలకొంది. ప్రాజెక్టు కంటే ముందే కాలువలు పూర్తయ్యాయని ప్రచారం జరిగినప్పటికీ ఎడమ ప్రధాన కాలువ మాత్రం 60.92 శాతం మాత్రమే పూర్తయింది.