హైదరాబాద్: ప్రైవేటు వ్యక్తుల నుంచి భారీ వడ్డీలకు అప్పులు తీసుకుని కష్టాల పాలవుతున్న రైతులను ఆదుకునేందుకు ఉద్దేశించిన రుణ విముక్తి కమిషన్ ఏర్పాటు బిల్లును తెలంగాణ అసెంబ్లీ గురువారం ఆమోదించింది. ఉప ముఖ్యమంత్రి, రెవెన్యూ మంత్రి మొహముద్ అలీ బిల్లును ప్రవేశపెట్టగా మూజువాణి ఓటుతో సభ ఆమోదించింది. ఈ బిల్లును విపక్షాలు స్వాగతించాయి.

హైదరాబాద్: మహారాష్ట్ర నుంచి కర్నాటక వరకూ ద్రోణి ప్రభావం, జార్ఖండ్‌లో ఉపరితల ఆవర్తనం కారణంగా తెలంగాణ, ఉత్తర కోస్తాలో గురువారం తేలికపాటి వర్షం కురిసే అవకాశం ఉంది. ముఖ్యంగా తెలంగాణ జిల్లాల్లో ఉరుములతో కూడిన వర్షం పడే సూచనలున్నాయి. రాయలసీమ, దక్షిణ కోస్తాలో మాత్రం వాతావరణం పొడిగా ఉంటూ వేసవి ప్రతాపం కొనసాగుతోంది.

హైదరాబాద్: తెలంగాణ అసెంబ్లీ చివరి రోజు సమావేశాలు గురువారం ఉదయం ప్రారంభమయ్యాయి. నీటి పారుదల ప్రాజెక్టుల రీ-డిజైనింగ్‌పై సిఎం కెసిఆర్ పవర్ పాయింట్ ప్రజెంటేషన్ ఇచ్చేందుకు సమాయత్తమయ్యారు. ఇందుకోసం శాసససభ, శాసనమండలిలో భారీ స్ట్రీన్‌లను ఏర్పాటు చేశారు. కాగా, సంప్రదాయాలకు భిన్నంగా అసెంబ్లీలో పవర్ పాయింట్ ప్రజెంటేషన్ నిర్వహణ పట్ల కాంగ్రెస్ సభ్యులు వ్యతిరేకత వ్యక్తం చేస్తున్నారు.

మహబూబ్‌నగర్: అయిజ మండలం పులికల్ గ్రామంలో మాజీ మహిళా సర్పంచ్ భర్త శేఖర్‌ను గురువారం తెల్లవారు జామున దుండగులు కత్తులతో పొడిచి దారుణంగా హత్య చేశారు. తన ఇంట్లో రెండో అంతస్థులో నిద్రిస్తున్న ఇతడిని దుండగులు హత్య చేసి గోడ దూకి పరారయ్యారు. శేఖర్ ఫైనాన్స్ వ్యాపారం చేసేవాడని, ఆర్థిక లావాదేవీల కారణంగానే హత్య జరిగి ఉంటుందని పోలీసులు అనుమానిస్తున్నారు.