హైదరాబాద్, ఆగస్టు 2: మల్లన్న సాగర్ రిజర్వాయర్ బాధితులను కలిసి పరామర్శించేందుకు మలి విడత ప్రయత్నం చేయాలని, ఈ దఫా లాఠీ దెబ్బలకు, పోలీసు తూటాలకు గురైనా సరే రాష్ట్ర ప్రభుత్వంతో తాడో-పేడో తేల్చుకోవాలని తెలంగాణ ప్రదేశ్ కాంగ్రెస్ కమిటీ నిర్ణయించింది. ఈ నెల 7న ప్రధాని నరేంద్ర మోదీ గజ్వేల్ రానున్నందున అదే రోజున పెద్ద ఎత్తున చలో మల్లన్న సాగర్‌కు బయలుదేరాలని పార్టీ నేతలు భావిస్తున్నారు.

తిరుపతి, ఆగస్టు 2 : భక్తుల కోసం శ్రీవేంకటేశ్వర స్వామి, అలుమేలు మంగమ్మ ప్రతిమలతో వెండి డాలర్లను తయారు చేయాలని తిరుమల తిరుపతి దేవస్థానం నిర్ణయించింది. 5, 10 గ్రాములతో రెండు రకాలైన డాలర్లను తయారు చేస్తారు. ఇందుకోసం టిటిడి రూ.5.5కోట్ల రూపాయలను కేటాయించారు. మంగళవారం తిరుమల అన్నమయ్య భవన్‌లో జరిగిన ధర్మకర్తల మండలి సమావేశంలో పలు నిర్ణయాలు తీసుకున్నారు.

హైదరాబాద్, ఆగస్టు 2: కృష్ణానదిలో వరద ఉద్ధృతి ఎక్కువగా ఉండటంతో సెక్యూరిటీ మెష్‌లు ఏర్పాటు చేయాల్సిందిగా తెలంగాణ ప్రభుత్వ ప్రధాన కార్యదర్శి రాజీవ్ శర్మ అధికారులను ఆదేశించారు. సచివాలయం నుంచి మంగళవారం నల్లగొండ, మహబూబ్‌నగర్ కలెక్టర్లతో వీడియో కాన్ఫరెన్స్ ద్వారా సిఎస్ సమీక్షించారు. కృష్ణా పుష్కరాలు సమీపించడంతో పనులన్నింటినీ గడువులోగా పూర్తి చేయాలని రాజీవ్ శర్మ ఆదేశించారు.

హైదరాబాద్, ఆగస్టు 2: తెలంగాణ ఎమ్సెట్-2 ప్రశ్నాపత్రం లీకేజిపై దర్యాప్తు చేస్తున్న సిఐడి తీరును పర్యవేక్షించేందుకు హైకోర్టు నిరాకరించింది. ఎమ్సెట్ ప్రశ్నాపత్రం లీకైనందువల్ల తాజాగా నోటిఫికేషన్‌ను ఆదేశించాలని, సిఐడి దర్యాప్తును పర్యవేక్షించాలని కోరుతూ ఎస్ మహేందర్ రాజు అనే న్యాయవాది పిటిషన్ దాఖలు చేశారు. ఈ పిల్‌ను హైకోర్టు మంగళవారం విచారించింది.