రాజమహేంద్రవరం, సెప్టెంబర్ 19: రాష్ట్రంలోని ఎయిర్‌పోర్టులు, ఓడరేవులను అభివృద్ధిచేయడంతోపాటు కొత్తగా మరిన్ని ఏర్పాటుచేయడం ద్వారా అభివృద్ధికి బాటలు వేస్తామని ముఖ్యమంత్రి చంద్రబాబు అన్నారు. త్వరలో రాజమహేంద్రవరం, తిరుపతి విమానాశ్రయాలను అంతర్జాతీయ విమానాశ్రయాలుగా అభివృద్ధి చేస్తామన్నారు.

రాజమండ్రి : హోదాతో సమానంగా ప్యాకేజీ ఇస్తామంటే ఎందుకు తీసుకోకూడదని, నిధులు ఉంటేనే అభివృద్ధి సాధ్యమని, దానికి హోదా ఐతేనేమి, ప్యాకేజీ ఐతేనేమి అని ముఖ్యమంత్రి చంద్రబాబు సోమవారం పేర్కొన్నారు. తాను ఎవరికీ భయపడనని, ఎక్కడా రాజీ పడేది లేదని అన్నారు. రాష్ట్ర అభివృద్ధిని వైసీపీ అడుగడుగునా అడ్డుకుంటోందని, వైసీపీకి ప్రజలే తగిన బుద్ధి చెబుతారని చంద్రబాబు చెప్పారు.

కడప: ఎస్‌ఐ రమేష్‌బాబు సస్పెన్షన్‌కు నిరసనగా రైల్వేకోడూరు హైవేపై సోమవారం విపక్షాల ఆందోళన కొనసాగుతోంది. మంత్రి గంటా కారును అడ్డుకునేందుకు విపక్షాలు యత్నించాయి. పోలీసులు ఆందోళనకారులపై లాఠీచార్జ్ చేశారు. తప్పుడు ఆరోపణలతో ఎస్‌ఐని సస్పెండ్‌ చేశారని విపక్షాలు ఆరోపించాయి.

హైదరాబాద్‌: ప్యాకేజీలో లేనివి ఏమిటో చెప్పాలని, ఏపీకి ప్రత్యేక హోదా అంశంపై దుష్ప్రచారం ఆపాలని ఏపీ మంత్రి ప్రత్తిపాటి పుల్లారావు అన్నారు. కేంద్రం ఇచ్చిన హామీలకు చట్టబద్ధత కావాలని కోరుతున్నామని తెలిపారు. రబీలో 40 శాతం రాయితీపై అపరాల విత్తనాలు పంపిణీ చేస్తామని చెప్పారు. రైతులు తమ ఉత్పత్తులను విదేశాలకు ఎగుమతి చేసుకునే అవకాశం కల్పిస్తున్నామని వెల్లడించారు.