నందిగామ, ఆగస్టు 21: రాష్ట్రానికి ప్రత్యేక హోదాతోనే అన్ని వర్గాలకు న్యాయం జరుగుతుందని ప్రముఖ సినీ నటుడు శివాజీ అన్నారు. ఆదివారం పట్టణంలోని ఒక ప్రైవేటు కార్యక్రమంలో పాల్గొనేందుకు వచ్చిన ఆయన మీడియాతో మాట్లాడుతూ ప్రత్యేక హోదాపై తాను హైకోర్టులో వేసిన ప్రజా ప్రయోజన వాజ్యం (పిల్)ను స్వీకరించిందని, మరో రెండు వారాల్లో వాదనలు ప్రారంభం అయ్యే అవకాశం ఉందన్నారు. ఇది ఆంధ్రప్రదేశ్ ప్రజల విజయమన్నారు.

కర్నూలు, ఆగస్టు 21: కృష్ణాపుష్కరాల సందర్భంగా 10వ రోజు ఆదివారం పుణ్యస్నానాలకు వచ్చిన భక్తులతో కృష్ణానదీ తీరం కిటకిటలాడింది. కర్నూలు జిల్లాలోని శ్రీశైలం, సంగమేశ్వరంలో భక్తులు పుణ్యస్నానాలు చేసి శివనామం జపిస్తూ ఆనందపరవశులవుతున్నారు. శ్రీశైలం, సంగమేశ్వరంలోని పుష్కర స్నానఘాట్లలో ఆదివారం సుమారు 2.50 లక్షల మంది భక్తులు పుణ్యస్నానాలు ఆచరించినట్లు అధికారులు అంచనా వేశారు.

విజయవాడ, ఆగస్టు 21: కృష్ణా పుష్కరాలపై ప్రజల్లో మంచి స్పందన వచ్చిందని, గొప్ప స్పూర్తినిచ్చిందని, అన్ని వర్గాల ప్రజలలో ప్రభుత్వం పట్ల ఎనలేని విశ్వాసం పెరిగిందని ముఖ్యమంత్రి నారా చంద్రబాబు నాయుడు పేర్కొన్నారు. పుష్కరాల 10వ రోజు ఏర్పాట్లపై వివిధ ఘాట్ల ఇన్‌ఛార్జిలతో ఆదివారం ఉండవల్లిలోని తన నివాసం నుంచి టెలి కాన్ఫరెన్స్ నిర్వహించారు.

తిరుమల, ఆగస్టు 21: ఒక దేశాధ్యక్షుడు డ్రైవర్ కోసం 10 నుంచి 12 నిమషాలపాటు వేచి ఉండాల్సిన పరిస్థితి తిరుమల శ్రీవారి సన్నిధిలో ఆదివారం చోటుచేసుకుంది. ఒక ప్రముఖుడు వచ్చినపుడు తీసుకోవాల్సిన జాగ్రత్తలపై టిటిడి, పోలీస్ అధికారుల మధ్య సమన్వయ లోపం బయటపడింది. కాగా డ్రైవర్లకు దర్శనం చేయించడంలో నిర్లక్ష్యం వహించారంటూ అర్బన్ ఎస్పీ జయలక్ష్మి ఆలయ డిప్యూటీ ఇఓ కోదండరామారావుపై ఆగ్రహం వ్యక్తం చేశారు.