విజయవాడ: రియో ఒలంపిక్స్‌లో రోజుకు 50వేల మందికి ఆహారం అందించారని, అయితే విజయవాడ బస్టాండ్ పుష్కరనగర్ దగ్గర ఆదివారం ఒక్కరోజే 2 లక్షల మందికి అన్నదానం చేశామని, ఇది ప్రపంచ రికార్డని సీఎం చంద్రబాబు వ్యాఖ్యానించారు. పుష్కరాల్లో రోజుకు లక్షన్నరమందికి అన్నదానం చేశామని చెప్పారు. కృష్ణా పుష్కరాల్లో అన్నదానం, పరిశుభ్రత వివరాలను గిన్నిస్ బుక్‌కు పంపాలని సీఎం అధికారులను ఆదేశించారు.

విజయవాడ: ఒలింపిక్స్‌లో పతకం సాధించి దేశ ఖ్యాతిని ప్రపంచానికి చాటి చెప్పిన బ్యాడ్మింటన్ క్రీడాకారిణి పి.వి.సింధుకు ముఖ్యమంత్రి చంద్రబాబు చేతుల మీదుగా విజయవాడలో రేపు సన్మానం జరగనుంది. ఉ.10 గంటలకు గన్నవరం నుంచి మున్సిపల్ స్టేడియం వరకు భారీ ర్యాలీ నిర్వహించనున్నారు. రేపు కృష్ణా పుష్కరాల హారతి కార్యక్రమంలో సింధు పాల్గొంటుంది.

ఏలూరు: ఏలూరు సమీపంలో సోమవారం తెల్లవారుజామున ఆగి ఉన్నలారీని బస్సు ఢీకొట్టింది. ఈ ఘటనలో 10 మందికి గాయాలయ్యాయి. విజయవాడ నుంచి సింహాచలం వెళ్తుండగా ఈ ప్రమాదం చోటుచేసుకున్నట్టు తెలుస్తోంది. గాయపడ్డవారిని ఏలూరు ప్రభుత్వాస్పత్రికి తరలించారు.

విజయవాడ: పుష్కరాలలో సోమవారం ఉదయం విధులు నిర్వహిస్తున్న కాకినాడకు చెందిన హెడ్‌ కానిస్టేబుల్‌ ఏఎన్‌.ప్రసాద్‌‌ గుండెపోటుతో ఒక్కసారిగా కుప్పకూలాడు. పోలీసులు వెంటనే ఆస్పత్రికి తరలించారు.
ఆస్పత్రిలో చికిత్స పొందుతూ ప్రసాద్‌‌ మృతి చెందాడు.