విజయవాడ: పసిడి పతకం చేజారడం బాధగా ఉన్నా, ఒలింపిక్స్‌లో పతకం సాధించాలన్న నా కల సాకారమైందని పీ.వీ.సింధు సంతోషం వ్యక్తం చేశారు. ఏపీ ప్రభుత్వం చూపిన ఆదరణ మరువలేనిదని అన్నారు. ఎయిర్‌పోర్టు, స్టేడియం దగ్గర ప్రజల నుంచి వచ్చిన స్పందన చూసి ఆశ్చర్యం కలిగిందని ఆమె తెలిపారు. ప్రజల ఆశీస్సుల వల్లే పతకం వచ్చిందని అన్నారు. కోచ్‌ గోపీచంద్‌ సహకారంతోనే ఈస్థాయికి వచ్చానని ఆమె స్పష్టం చేశారు.

విజయవాడ: ఏపీలో పుష్కరాల నిర్వహణ, ఏర్పాట్లు బాగున్నాయని మైసూరు దత్తపీఠాధిపతి గణపతి సచ్చిదానంద స్వామి సీఎం చంద్రబాబును మంగళవారం అభినందించారు. పవిత్ర సంగమం వద్ద పుష్కర హారతికి రావాలని ఆయనను సీఎం ఆహ్వానించారు.

విజయవాడ: రియో ఒలింపిక్స్‌లో భారతీయులకు పీవీ సింధు ఆశాకిరణంలా కనిపించిందని ఏపీ సీఎం చంద్రబాబునాయుడు అన్నారు. విజయవాడలోని ఇందిరాగాంధీ మున్సిపల్‌ మైదానంలో ఒలింపిక్స్‌లో రజత పతక విజేత నిర్వహించిన సింధు విజయోత్సవ సభలో ఆయన పాల్గొన్నారు. సింధును తీర్చిదిద్దడంలో కోచ్‌ గోపీచంద్‌, తల్లిదండ్రులు రమణ, విజయల ప్రోత్సాహం ఎనలేనిదన్నారు. సింధును శాలువా, పుష్పగుచ్ఛాలతో చంద్రబాబు సత్కరించారు.

విజయవాడ: తన తాతగారి వూరైన విజయవాడలోని ఇండోర్‌ స్టేడియంలో బ్యాడ్మింటన్‌ ఆడానని సింధు చిన్ననాటి జ్ఞాపకాలను నెమరువేసుకున్నారు. ఆంధ్రప్రదేశ్‌ ప్రభుత్వం ఆధ్వర్యంలో విజయవాడలోని ఇందిరాగాంధీ మున్సిపల్‌ స్టేడియంలో సింధుకు సన్మానం జరుగుతున్న సందర్భంగా ఆమె మాట్లాడారు. ప్రజల ప్రేమ, అభిమానాలతోనే తాను ఈ స్థాయికి చేరుకున్నట్లు సింధు అన్నారు.