హైదరాబాద్: ఎపికి ప్రత్యేకహోదా సాధించే విషయమై ఏదో ఒకటి చేయాలని తనకు కూడా ఉందని, అయితే ఏం చేయాలన్నది ఇపుడే చెప్పలేనని జనసేన అధినేత, సినీనటుడు పవన్ కల్యాణ్ అన్నారు. కర్నాటక మాజీ సిఎం కుమారస్వామితో శనివారం భేటీ అయిన సందర్భంగా పవన్ కొద్దిసేపు మీడియాతో మాట్లాడారు. హోదా కోసం ఎంపీలు మాత్రమే ఏదో ఒకటి చేయగలరని, కేంద్రం ఏం చేస్తుందో వేచి చూడిల్సిందేనన్నారు.

విశాఖ: విశాఖ బీచ్‌ రోడ్‌లో కోస్టల్‌ బ్యాటరీ కారిడార్- కైలాసగిరి మధ్య నిమజ్జనాలు నిషేధిస్తున్నట్లు గణేష్‌ నిమజ్జనాలపై ఆంక్షలు విధించినట్లు విశాఖ కలెక్టర్‌ ప్రవీణ్‌కుమార్‌, సీపీ యోగానంద్ తెలిపారు. రేపటి నుంచి గణేష్ మండపాలకు అనుమతులు ఇస్తున్నట్లు ప్రకటించారు. సెప్టెంబర్‌ 12నుంచి 16వరకు బ్రిక్స్‌ సదస్సు నేపథ్యంలో బీచ్‌ రోడ్‌లో నిమజ్జనాలు నిషేధిస్తున్నట్లు తెలిపారు.

విజయవాడ: రియో ఒలింపిక్స్‌లో రజత పతకాన్ని సాధించిన పివి సింధుకు 3 కోట్ల రూపాయలు, ఆమె కోచ్ గోపీచంద్‌కు 50 లక్షల రూపాయల నగదు నజరానా ఇవ్వాలని ఎపి మంత్రివర్గ సమావేశంలో ప్రతిపాదించినట్టు తెలిసింది. నవ్యాంధ్ర రాజధానిలో సింధుకు వెయ్యి గజాల ఇంటి స్థలం, బ్యాడ్మింటన్ అకాడమీ ఏర్పాటు చేసేందుకు గోపీచంద్‌కు స్థలం ఇవ్వాలని కూడా సిఎం చంద్రబాబు ప్రతిపాదించారని సమాచారం.

విజయవాడ: సెప్టెంబర్ 6 నుంచి హైదరాబాద్‌లోనే ఏపీ అసెంబ్లీ సమావేశాలు నిర్వహించాలని ఏపీ కేబినెట్ శనివారం నిర్ణయించింది. సీఎం అధ్యక్షత జరుగుతున్న కేబినెట్‌లో పలు అంశాలపై చర్చించారు. వారం రోజుల పాటు అసెంబ్లీ సమావేశాలు జరుగనున్నాయి. కృష్ణాపుష్కరాల ముగింపు సందర్భంగా ఎలాంటి కార్యక్రమాలు నిర్వహించాలనే అంశంపై కేబినెట్ చర్చ జరుగుతోంది.