కర్నూలు, ఆగస్టు 19: కృష్ణా పుష్కరాలు ముగింపు దశకు చేరుకుంటుండడం, శ్రావణమాసం చివరి శుక్రవారం కావడంతో పుణ్య స్నానాలకు భక్తులు పోటీ పడ్డారు. పుష్కరాలకు కేవలం నాలుగు రోజులే ఉండటంతో కర్నూలు జిల్లాలోని శ్రీశైలం, సంగమేశ్వరంలో భారీ సంఖ్యలో పుష్కర స్నానాలాచరించారు. శుక్రవారం సుమారు 90 వేల మంది భక్తులు పుణ్య స్నానాలు చేశారని అధికారులు ప్రకటించారు.

విశాఖపట్నం, ఆగస్టు 19: కేంద్ర ఉపరితల రవాణా, షిప్పింగ్ మంత్రి నితిన్ గడ్కరీతో సిఎం చంద్రబాబు నాయుడు భేటీ అయ్యారు. విశాఖలో బుధవారం ప్రారంభమైన రహదారి భద్రతపై జాతీయ వర్క్‌షాప్‌లో పాల్గొనేందుకు వచ్చిన గడ్కరీని చంద్రబాబు కలుసుకుని పలు అంశాలపై చర్చించారు. దేశంలో జరుగుతున్న రోడ్డు ప్రమాదాల్లో 6 శాతం ఆంధ్రప్రదేశ్‌లోనే చోటుచేసుకుంటున్నాయని పేర్కొన్నారు.

హైదరాబాద్, ఆగస్టు 19: సింధును చూసి తల్లిదండ్రులుగా తాము, బిడ్డగా భరతమాత గర్విస్తోందని ఆమె తండ్రి రమణ అన్నారు. సింధు రజత పతకం గెలుచుకోవడంపట్ల హైదరాబాద్‌లో ఆమె తండ్రి రమణ స్పందిస్తూ సింధు విజయంలో భాగమైన ప్రతి ఒక్కరికీ ధన్యవాదాలు తెలియజేశారు. తొలి సెట్‌లో సింధు అద్భుతంగా ఆడినప్పటికీ రెండో సెట్, మూడో సెట్లలో అవకాశాలను పాయింట్లుగా మలచుకోవడంలో వెనుకబడిందని రమణ విశే్లషించారు.

శ్రీశైలం, ఆగస్టు 19: కృష్ణా పుష్కరాలను పురస్కరించుకుని భారత ప్రభుత్వ తపాలాశాఖ పవిత్రమైన శ్రీశైలం ఆలయ చిత్రాన్ని పోస్టల్ కవర్‌పై ప్రత్యేకంగా ముద్రించింది. ఈ ముద్రణ కవర్లను శుక్రవారం తపాలా కార్యాలయంలో అధికారులు ఆవిష్కరించారు. ఈ కార్యక్రమంలో కలెక్టర్ విజయ్‌మోహన్, ఎస్పీ రవికృష్ణ, శ్రీశైలం దేవస్థానం ఇఓ నారాయణ భరత్‌గుప్త, కర్నూలు పోస్టుమాస్టర్ సంజీవ్‌రంజన్, సూపరింటెండెంట్ సుబ్బారావు పాల్గొన్నారు.