హైదరాబాద్: టిడిపి ఎమ్మెల్యే అనితను ఉద్దేశించి తాను ఎలాంటి తప్పుడు వ్యాఖ్యలు చేయలేదని, తన మాటలు ఆమెకు బాధకలిగిస్తే వాటిని ఉపసంహరించుకునేందుకు తాను సిద్ధమేనని వైకాపా ఎమ్మెల్యే రోజా బుధవారం ఎపి అసెంబ్లీలో హక్కుల కమిటీ ముందు చెప్పారు. తనపై టిడిపి ఎమ్మెల్యేలు కూడా తప్పుడు వ్యాఖ్యలు చేశారని, వాటిపై హక్కుల కమిటీకి ఫిర్యాదు చేశానని ఆమె తెలిపారు.

హైదరాబాద్: ఎపి అసెంబ్లీకి చెందిన హక్కుల కమిటీ బుధవారం భేటీ అయింది. టిడిపి ఎమ్మెల్యే అనిత ఇచ్చిన ఫిర్యాదుపై కమిటీ సభ్యులు విచారణ చేపట్టారు. అసెంబ్లీ నుంచి ఏడాదిపాటు బహిష్కరణకు గురైన వైకాపా ఎమ్మెల్యే రోజా కమిటీ ఎదుట హాజరయ్యారు.

నెల్లూరు: రెండేళ్లుగా ప్రతిపక్షంలో ఉంటూ ప్రజల కోసం ఏమీ చేయలేకపోయానని, నియోజకవర్గాన్ని అభివృద్ధి చేసేందుకే తాను ఉగాది రోజున టిడిపిలో చేరుతున్నానని గూడూరు వైకాపా ఎమ్మెల్యే సునీల్ బుధవారం తెలిపారు. టిడిపిలో చేరాక త్వరలోనే బహిరంగ సభ నిర్వహించి తన మనోభావాలను ప్రజలకు వివరిస్తానన్నారు. గూడూరు నియోజకవర్గంలో ప్రగతి పనులకు పదికోట్ల రూపాయలు కేటాయిస్తానని సిఎం చంద్రబాబు హామీ ఇచ్చారన్నారు.

శ్రీకాకుళం: విధి నిర్వహణలో భాగంగా ఇసుక రేవు వద్ద ఉన్న అసిస్టెంట్ ఇంజనీర్ వడదెబ్బకు గురై మరణించిన దుర్ఘటన నరసన్నపేట మండలంలో బుధవారం జరిగింది. గ్రామీణ నీటి సరఫరా విభాగం (ఆర్‌డబ్ల్యుఎస్)లో ఎఇగా పనిచేస్తున్న నాగభూషణరావు మడపాం వద్ద వంశధార నదీ తీరంలో ఇసుక రేవు వద్ద విధులు నిర్వహిస్తున్నారు. ఎండదెబ్బకు తట్టుకోలేక ఉన్నచోటనే ఆయన కుప్పకూలి మరణించినట్లు మిగతా సిబ్బంది తెలిపారు.