దిల్లీ: అసెంబ్లీ నుంచి తనను ఏడాది పాటు సస్పెండ్ చేయడం అన్యాయమని పేర్కొంటూ వైకాపా ఎమ్మెల్యే రోజా దాఖలు చేసిన పిటిషన్‌పై సుప్రీంకోర్టు గురువారం విచారణ చేపట్టింది. ఈ సస్పెన్షన్‌ను ఎలా సమర్థించుకుంటారో వివరణ ఇవ్వాల్సిందిగా ఎపి ప్రభుత్వానికి సుప్రీం ధర్మాసనం నోటీసులు జారీ చేసింది. సహజ న్యాయసూత్రాలకు భిన్నంగా తనను సస్పెండ్ చేశారని రోజా సుప్రీంకు నివేదించారు.

విజయవాడ: టిడిపి యువనేత నారా లోకేష్‌ను ఎపి మంత్రివర్గంలోకి తీసుకుంటే అన్ని విధాలా మంచిదేనని సమాచార శాఖామంత్రి పల్లె రఘునాథరెడ్డి గురువారం ఇక్కడ విలేఖరులతో అన్నారు. రికార్డు స్థాయిలో కార్యకర్తలను చేర్పించి టిడిపి బలోపేతానికి కృషి చేసిన లోకేష్‌ను మంత్రివర్గంలోకి తీసుకుంటే ఆయన సేవలు ప్రభుత్వానికీ అందుబాటులోకి వస్తాయన్నారు.

విజయవాడ: విద్యుత్ రంగంలో దేశంలోనే తొలిసారిగా సంస్కరణలు ప్రవేశపెట్టి వినూత్న ఆలోచనలతో ఆంధ్రప్రదేశ్ రాష్ట్రం ముందుకు సాగుతోందని ఎపి సిఎం చంద్రబాబు అన్నారు. విజయవాడలో గురువారం అంతర్జాతీయ ఇంధన సదస్సును ప్రారంభించిన సందర్భంగా ఆయన మాట్లాడుతూ, ప్రతి ఇంటికీ ఎల్‌ఇడి బల్బులను ఇవ్వడం ద్వారా విద్యుత్‌ను బాగా ఆదా చేస్తున్నామన్నారు. విద్యుత్‌ను ఆదా చేసే ఫ్యాన్లు, వ్యవసాయ మోటార్లను ఆయన ప్రారంభించారు.

రాజమండ్రి: చింతూరు మండలం పిడుగురాళ్లపల్లిలో శంకర్ అనే వ్యక్తి కనిపించకుండా పోయినట్లు, మావోయిస్టులే ఇతడిని కిడ్నాప్ చేసినట్లు గ్రామస్థులు పోలీసులకు ఫిర్యాదు చేశారు. కిడ్నాప్ సంఘటనపై అనుమానాలు రావడంతో ఇది మావోయిస్టుల పనా? లేక ఇంకెవరైనా శంకర్‌ను పట్టుకుపోయారా? అని పోలీసులు ఆరా తీస్తున్నారు.