న్యూఢిల్లీ, ఆగస్టు 20: భారతీయ విద్యార్థులను ఆకర్షించేందుకు తమ ప్రభుత్వం అనేక చర్యలు తీసుకుంటోందని భారత్‌లో న్యూజిలాండ్ రాయబారి జొన్నా కెంప్‌కెర్స్ వెల్లడించారు. ప్రతి ఏటా దాదాపు 20వేల మంది భారతీయ విద్యార్థులు తమ దేశంలో ఉన్నత విద్యను అభ్యసించేందుకు వస్తున్నారని, వారి సంఖ్యను మరింత పెంచేందుకు మూడేళ్ల కాలానికి పోస్ట్-స్టడీ వర్క్ వీసాను అందుబాటులోకి తీసుకొచ్చినట్లు తెలిపారు.

హిసార్, ఆగస్టు 20: బౌద్ధమతం స్వీకరించినందుకు దాదాపు 300 మంది దళితులను ఏడాదికి పైగా సాంఘిక బహిష్కరణ చేశారు. ఈ సంఘటన హర్యానాలోని హిసార్ జిల్లాలో వెలుగుచూసింది. భాట్లా గ్రామంలోని 300 మంది దళితులు బౌద్ధమతాన్ని స్వీకరించారు. దీనిని సహించలేని అగ్రవర్ణాలవారు వారిని ఏడాదిపాటు గ్రామ బహిష్కరణ విధించారు.

న్యూఢిల్లీ, ఆగస్టు 20: కేరళ ప్రకృతి విలయాన్ని అత్యంత తీవ్ర స్వభావం కలిగిన ప్రకృతి వైపరీత్యంగా కేంద్ర ప్రభుత్వం ప్రకటించింది. వారం రోజులుగా రాష్ట్రాన్ని ముంచెత్తిన వర్షాలు, వరదలు, మరణాలు, ఆర్థిక నష్ట తీవ్రతను, పరిధిని దృష్టిలో పెట్టుకుని ఈ నిర్ణయం తీసుకున్నట్టు కేంద్ర హోమ్‌మంత్రిత్వశాఖ అధికారి ఒకరు తెలిపారు.

తిరువనంతపురం, ఆగస్టు 20: కేరళ జలవిలయంలో బాధితులకు సెంట్రల్ జైలు ఖైదీలు కూడా తమవంతు సాయం అందించేందుకు శ్రమిస్తున్నారు. తిరువనంతపురం పుజప్పురాలోని కేంద్ర కారాగారంలో ఖైదీలు చపాతీల తయారీలో ప్రస్తుతం తలమునకలయ్యారు. ఈ చపాతీలను శిబిరాల్లో తలదాచుకుంటున్న వరద బాధితులకు అందజేస్తున్నట్లు జైలు అధికారులు తెలిపారు. పెద్దమొత్తంలో చపాతీలు, శాఖాహార వంటకాలను జైలులో ఈ ఖైదీలు తయారుచేస్తున్నారు.