న్యూఢిల్లీ : దేశ రాజధాని ఢిల్లీలో సోమవారం ఉదయం పొగమంచు తీవ్రతతో దాదాపు 30 రైళ్లను అధికారులు రద్దు చేశారు. 75 రైళ్లు ఆలస్యంగా నడుస్తున్నట్లు తెలిపారు. ఆదివారం ఉదయం అత్యల్పంగా 6.7 డిగ్రీల ఉష్ణోగ్రత నమోదైనట్లు వాతావరణ శాఖ అధికారులు వెల్లడించారు. దీంతో రైళ్లు, వాహనాల రాకపోకలకు తీవ్ర అంతరాయం ఏర్పడింది.

ఇటానగర్: రాజకీయ సంక్షోభం నేపథ్యంలో అరుణాచల్‌ప్రదేశ్‌లో రాష్టప్రతి పాలన సోమవారం నుంచి అమల్లోకి వచ్చింది. అరుణాచల్ అసెంబ్లీలో గత నెల 16న స్పీకర్‌కు ఉద్వాసన పలికేందుకు 21 మంది కాంగ్రెస్ తిరుగుబాటు ఎమ్మెల్యేలు, 11 మంది బిజెపి ఎమ్మెల్యేలు చేతులు కలపడంతో రాజకీయ సంక్షోభం ఏర్పడింది. కేంద్ర మంత్రిమండలి సూచన మేరకు రాష్టప్రతి పాలన విధించారు.

కోల్‌కతా, జనవరి 24: స్వాతంత్య్ర యోధుడు నేతాజీ సుభాష్ చంద్ర బోస్ మృతిపై దర్యాప్తుకు భారత్-జపాన్ సంయుక్త దర్యాప్తును ఏర్పాటు చేయాలన్న అభ్యర్థనకు 1967లో అప్పటి భారత ప్రభుత్వం ఇష్టపడలేదు. జపాన్ ఆర్మీ రిటైర్డ్ అధికారి ఇవయిచి ఫుజివారా ఈ అభ్యర్థన చేశారు. ఫుజివారా కోల్‌కతాలోని నేతాజీ మ్యూజియంకు ఆయనకు చెందిన కత్తిని అందజేయడానికి 1967 మార్చి 19న నగరానికి వచ్చారు.

న్యూఢిల్లీ, జనవరి 24: భారత్‌కు రూ.60వేల కోట్ల విలువ గల రఫాలే యుద్ధ విమానాలను విక్రయించే ఒప్పందం సరయిన పంథాలో సాగుతోందని ఫ్రాన్స్ అధ్యక్షుడు ఫ్రాంకోయిస్ హోలాన్ స్పష్టం చేశారు. ఇరు దేశాల మధ్య అసాధారణ స్థాయిలో రానున్న 40ఏళ్ల పాటు పారిశ్రామిక, సాంకేతిక పరిజ్ఞానం రంగాల్లో ద్వైపాక్షిక సహకారానికి ఇది మార్గం సుగమం చేస్తుందని ఆయన అన్నారు. హోలాన్ భారత పర్యటన ఆదివారం చండీగఢ్ నుంచి మొదలయింది.